ШАНЬ КОМИ СИКТЪЯС

   Пыр нимкодяся да шензя... Миян сэтшӧм ыджыд да озыр республиканым! Россияса мукӧд регионсӧ либӧ весиг суйӧрсайса мукӧд канмусӧ позьӧ некымын лунӧн кытшовтны. Буретш тадзи менам некымынысь нин артмыліс. Шуам, коркӧ 9 кымын лунӧн автобусӧн ветлім европаса 7 канмуӧ. Аддзылім Финляндия, Швеция, Франция, Германия, Дания, Голландия да дзик неуна - Бельгия.  Колян вося гожӧмнас 2 вежонӧн аддзылі Краснодар край да Кабардино-Балкарияса уна кар да мича ин. Коми мунымӧс тайӧ каднас он кытшовт! Со и атмӧ, кавшасьлі Эльбрус вылӧ, но эз аддзыв Урал... А Княжпогост, Вуктыл, Чилимдін, Воркута - тайӧ быттьӧ мӧд планетаяс...

   Мупытшса да пармаса озырлунъяс кындзи миян регионным ёна озыр мича сиктъясӧн да шань коми йӧзӧн.  Университет помалі 3 во сайын нин. Ӧні гӧгӧрвоа, кутшӧм бур, кор ӧти позйӧ овмӧдчӧны республика пасьталаысь ныв-зон. Ӧтуволанінын медводдза лунъяссяньыс быдӧн заводитӧ гӧгӧрвоны коми кывлысь озырлунсӧ. "Тшутшку", "джек", "ныы", "пони" да мукӧд кывъяс вежӧртӧм бӧрын висьтасян нин чужан грезддорса мича инъяс йылысь, кӧні кыдзи гӧтрасьӧны да гуасьӧны, мукӧдтор. Вылыс тшупӧда велӧдчанін помалӧм бӧрын разалім  коді кытчӧ. Талун менам студенталан чой-вокӧй олӧны Сыктывкарын, Удораын, Луздор, Сыктыв, Кулӧмдін районъясын, Вуктылын, Инта районын, Вежа Петыр карын. Ставӧн ми ёртасям, да эм кӧ позянлун, пыр зілям аддзысьлыны. 

   Студенталігӧн на ми ветлӧдлім ӧта-мӧд дорӧ гӧсти. Шуам, ме вӧлі Елюк дорын Зимстанын, Маринук дорын Усогорскын, ӧти Юлюк дорын Косланын, а мӧд дорын - Важгортын. Аслам гортӧ кыскылі сёрнисикасъяс туялан практика дырйи джын группанымӧс. А коді эз удит петкӧдлыны ассьыс сиктсӧ ёртыслы велӧдчигӧн, тайӧс позьӧ вӧчны талун.)) Ӧні миян семьыян кык Королева. Королева - "жена князяӧс" ті нин бура тӧданныд. Мӧд Королевакӧд ми эг сӧмын ӧтлаын велӧдчӧй, но и ӧтлаын уджалам. Тайӧ, дерт жӧ, ставлы тӧдса телекодзув Любовь Королева.)) Колян шойччан лунъясӧ Люба восьтіс меным республиканымлысь нӧшта ӧти, ой, весиг кык пельӧс!
   Ветлім Любалӧн Вера Михайловна мамыскӧд да поддельнӧйса школьникъяскӧд походӧ Дӧрӧшӧ (сэтшӧм нимкодь вӧлі, мый став челядьыс сёрнитӧны комиӧн!)

 

Буглясим лыаын да нимкодясим вӧр-ваӧн Ларувын. 

 

Пажын кадӧ сёйим петшӧра чӧскыд шыд.
Трӧича водзын субӧтаӧ ветлім шойна вылӧ.
Бура мыссим пывсянын!
Видзӧдім фотоальбомъяс да "Холостяк" телешоу.))
Любаяслӧн мича керка бокын меститчысь качай вылын удитліс кольмыны юрӧй.)  

 

  Пӧддельнӧйын полім сывны шонді улын, а Шойнатыӧ кежавлігӧн полім гыма зэрысь. Полім... Но веськалім сы улӧ Эжваті мотора пыжӧн гуляйтӧм бӧрын.)) Кӧтасим, кӧмнымӧс няйтсьӧдім сёя муӧн, но сьӧлӧм вылын вӧлі долыд! Коми сиктъясӧ коркӧ ёна важӧн поздысьлӧма шаньлун. И буретш сыӧн тані ставыс лолалӧ!
   Аттьӧ шойччан лунъясысь Любуклы, Мишалы, Вера Михайловналы, Поддельнӧйса да Шойнатыса вӧр-валы да шань йӧзлы!

Но и ӧти ачпас:

КЫКӦН

   "Зал для двоих" нима выставка видзӧдны корысь афишаяс важӧн нин ылӧдлӧны менсьым "завиднӧй" (кыдзи шуӧ мамӧй) синмӧс. 

 

  Шуим тӧрыт менам муса ёрт Армениумкӧд (збыль вылас Арменуи) ветлыны кытчӧкӧ озырмӧдыштны ловнымӧс. Видзӧдлі, кутшӧм спектакъяс лоӧны - ставсӧ нин аддзылі. Мися, вай выставка вылӧ ветлам! Вӧлӧмкӧ, бӧръя лун тайӧ экспозициясӧ петкӧдлӧны. Позьӧ шуны, чеччыштім Армениумкӧд мунысь поездӧ. ;)

   Инга Поповская да Саша Порошкина - сыктывкарса том серпасасьысьяс. Найӧ неважӧн памалӧмаӧсь Сыктывкарса Канму университетын искусствояс факультет. Ми нимкодясим нывъяслӧн фотоясӧн, живописьӧн да графикаӧн.Уджъясысь тыдалӧ, мый Инга да Саша ёна радейтӧны ёртъяссӧ, бипур бокын гитараӧн ворсӧм, выль инъяс, пемӧсъясӧс да ставнас олӧмсӧ.
   Неыджыд фотоотчёт: 

 Мый эськӧ кӧсйӧ кыйны бутыльнас зонмыс... Сашалӧн тайӧ фотоыс меным медъёна кажитчис.

Инга зіьӧ "ДРУГ" кӧзяинтӧм понъясӧс видзанінын.

 

Радейтана кружкалы сиӧм серпас! Збыль... Тадзи и эм! Мукӧдъясыс "сьӧлӧм берданыс" видзӧны найӧс...

 Колим нывъяслӧн "серпасасян" историяӧ ассьыным "ки туй"...

Интереснӧ, мый "Кыкӧнлы жырйӧ" ми ветлім кыкӧн жӧ. Выставкалӧн нимас быттьӧ аслыспӧлӧс индӧд, кодкӧд ветлыны сэтчӧ. ))

КЫК ДА ДЖЫН КЕКӦНАЧ!!!

       Удораса Черныбын «Лицей при МИ» колис нин кык вежон сайын, а юрын да сьӧлӧмын пыр на кылӧ «кык да джын кекӧнач»… Мый тайӧ? Тайӧ "бурсьыс-бура" донъялӧм!  

Важӧн нин юӧртім, кыдзи ставыс колис. Ӧні окота юксьыштны лицейса серамбанаторъясӧн.  

•  Черныбӧ мунігӧн сёрнитім сы йылысь, мый ёна кӧ мый йылыськӧ мӧвпавны, сійӧ быть лоӧ. Юлюк Королева висьталіс, мый неважӧн сійӧ «притянитӧма» вой кыа. Петім нин поездысь, мунам машинаӧн. Другысь нывъяс кыдз тай горӧдасны!!! Ӧшиньӧдыс кодкӧ аддзӧма вой кыа. Черныбын нин нимкодясьыштім миян кӧсйӧм серти артмӧм вӧр-ва мича петкӧдчӧмнас. 

• Сійӧ жӧ войнас. Кор куйлан кык судтаа крӧватлӧн вылыс джаджъяс, мирсӧ аддзан выльногӧн. Узьны водігӧн орчча крӧватлӧн вылыс судтасянь кыла: 

– Кутшӧм мича тэнад пельыд!

Ме:

- Дааа? Первойысь кыла! Менам сійӧ аслыспӧлӧс!

- Да? А менам тшӧтш эм уродство!

•       Медым стӧча тӧдны, кодӧс кыдзи шуӧны, корим бейджъясӧ быдӧнлы пасйыны ним да кыв, коді эськӧ тӧдчӧдіс налысь инсӧ тайӧ олӧмас. Артмис сідз, мый миян лои кык «катшасин». Ӧтиыс на пиысь  тавося «Райдаын» «Катшасин» ним босьтысь Маринук Роноева. Медым торйӧдны "дзоридзьяссӧ", Маринук лоис «официльнӧй катшасинӧн». 

 

•    Тӧдмасигӧн быдӧнлы сетім кодзув, кӧні гижӧма сёрникузя заводитчӧм. Ӧти зонлы веськаліс «Ме пыдди пукта … уджсикас». Вова гора шуис:

- Ме пыдди пукта ТРАКТОРИСТ уджсикас!

Кык лун чӧжсӧ зонмӧс сідзи и шуим «Вова тракторист». Черныбын радейтӧны ставныссӧ нимтыны. Гашкӧ, кӧвъясис да енбиа, бур зонлы тайӧ нимыс.))

• Мӧд кодзув вылын вӧлі гижӧма: «Менам радейтана козин…» Элла шуис: «Менам радейтана козин… лыжи, кодӧс меным кодкӧ козьналас!»  (Элла – лызьӧн ислалысь бур нывка, пырӧдчӧ быд сикас ордйысьӧмас).  

•     Элла йылысь жӧ.

«МИшкаяслӧн» важ ёрт Надюк – Эллалӧн чой. Олӧны Черныбын. Мыссим чойяслӧн пывсянын, пырим керкаӧ. Телевизорӧд петкӧдлӧны биатлон. Элла син вештытӧг видзӧдӧ.

Юлюк Надюклы:

- Ой! Кутшӧм тэнад киыд, Надюк, менам кодь жӧ, рӧбӧтшӧй! Эллаыдлӧн со кутшӧм мича кузь чуньясыс.

Надя:

- Дерт! Юрас сӧмын лыжи да!

Элла кыліс сӧмын «лыжи» кыв:

- Кодлӧн?!

Надя недыр думыштлӧм бӧрын:

- А… Шипулиныслӧн!

Ми Юлюккӧд гигзям, а Элла:

- Шипулиныслӧн абу сӧмын лызьяс, но и лыйсьӧм!

•  Удж заводитігӧн юалім том йӧзлысь, мый найӧ медъёна виччысьӧны «Лицей при МИсянь». Некымынӧн вочавидзисны:

- Ме виччыся… этнодискотека!

•       Рытнас корим шуны, мый медъёна кажитчис. Саша нима зон:

- Мне очень понравилась сегодня… еда!

Со тадзи ми лицеясим! Унатор на вӧлі! Кекӧначасьысьяс, содтӧй, мый эг пасйы! ))

"ПАРАКОД" - МЕДСЬӦКЫД КЫВ...

  Талун ме гижи олӧмам медся класснӧй диктантсӧ! Ӧтувъя диктант вылас мунтӧдз полыштны нин заводиті. Ёнджыкасӧ эг сы понда, мый дзик нинӧм ог тӧд. Майшаси, мый, гашкӧ, унаӧн оз и локны.
   Пыри, а йӧзыс тыр нин! И локтӧны, бара локтӧны... Сэтшӧм нимкодь лоис! Любӧ (тадзи шуӧны миян Удораын) вӧлі важ ёртъясӧс да тӧдсаясӧс паныдавны, а нӧшта на нимкодь вӧлі аддзыны выль чужӧмъяс! Сё дас гӧгӧр морт пӧ Сыктывкарын диктантсӧ гижӧма.

   Владимир Васильевич Тиминӧн гижӧм текстыс, чайта, эз вӧв ёна сьӧкыд, но ме тӧда нин, мый торкалӧмъяс менам эмӧсь... )) Серавтӧдз миян лои "паракод" кыв гижигӧн. Ыджыд жырйыс ставнас шызьыліс. Кӧнкӧ шӧпкӧдӧны "пароход", кодкӧ "парокод"... Со, мися, коми йӧзыд коми диктантын роч кывъяссӧ гижны оз кужны... Истиннӧй комияс!!!
   Университетса группасьыным ми вӧлім куимӧн: кык Королева (Юлюк да Любук) да ме. Зэв нимкодь вӧлі важ томдырйи моз орччӧн пукалӧмӧн гижны чужан кывйӧн диктант.

Шмонитышті весиг, мися, локтан воӧ диктант бӧрын колӧ ӧтвылысь тшай юны. Ӧд тані ми паныдасям важ ёртъяскӧд, тӧдмасям выль йӧзкӧд, тані ми быттьӧ ӧти семья. )) И мед, оз кӧ ставлӧн ло "4" да "5", ӧтувъя диктант вылӧ колӧ ветлыны долыд рула!

«КУЛЬ УПАКИТӦ!»

   «Гын сапӧг» — удораса ногӧн «упаки» (миянын мичаа шуӧны «упАки»). Тӧвнас тайӧ менам медрадейтана кӧм. Сиктын кӧть карын кӧдзыд лунъясӧ менсьым пыр кынмысь кокӧс сӧмын сійӧ вермас дорйыны! Во 2 -3 сайын ньӧби аслым руд рӧмаӧс, мичмӧдышті еджыд лентаӧн, да сідзи и ветлӧдла удж вылӧ кӧть гӧсти.
   Выль во кежлӧ ветлі гортӧ, Сёльыбӧ. Мамӧ ассьыс упакисӧ сетіс. Войнас кӧ сӧмын пӧрччывлі а шоныд да небыд кӧмсӧ...
   Ӧшым тӧлысь 31-ӧд лун. Ывлаас 30 минуса гӧгӧр. Рытнас чукӧртчим мамӧкӧд петавны клубӧ видзӧдны концерт. Пасьтаси нин, петны дась, а мамӧй меным: «Женя, куль упакитӧ! Тадзи он жӧ пет! Сапӧгась!» Ме: «Ог! Мыйла? Сапӧгӧн кынма!» А мамӧ: «Клубӧ ли бур туйӧ упакиӧн миян оз ветлыны. Коркӧ удж вылӧ мӧдӧдчи садйӧ. Тшӧтш упакиаси. А воча меным сиктса ань. Шензьӧмӧн шуӧ, тэ пӧ кытчӧ татшӧмасӧ мӧдӧдчин? А ме: «Садйӧ...  А лым талун колӧ зыртны да!» Сійӧ: «А но, сідзкӧ»... 

    Кывзі ме висьтсӧ, сералышті. Мися, но и модникъяс миян Сёльыбын. Карын том ни пӧрысь оз яндысь упакиӧн ветлыны, а тані ставыс мӧдног. Эк кывзысь мамӧлысь, упакинам и петі сиктса клубӧ. Колӧ ӧд «шоныд» модасӧ кодлыкӧ заводитны!

Р.S: А важӧн ветлӧмаӧсь жӧ клубӧ упакиӧн. Кор сиктса школаын на велӧдчи, мамӧй меным сетіс фетрысь вӧчӧм еджыд упаки, тайӧн пӧ бабыд танцы вылӧ ветлӧдлӧма. ;)

ЧӦСКЫД УНМА КОМИ КОЗИН

   Чужан лунӧй колян во помас нин вӧлі, а козинъяс тӧвшӧр тӧлысь быд на менӧ корсисны да нимкодьӧдісны... Со татшӧм менам тӧждысьысь рӧдвуж да ёртъяс! Ачым шензя.)) Ставлы ыджыд аттьӧ! Кӧть эськӧ и козиныс оз ков, тайӧ йӧзыс - менам олӧмын меддона козинъяс! 

    Со тайӧ козиныс суис менӧ Сёльыбын, кор тай ме выльвося шоччан лунъяс вылӧ ветлі гортӧ. Вайӧма сійӧс Разыбысь Маиса тьӧт, мамӧлӧн коймӧд кӧленаын чой. Тайӧ пӧ миян котырсянь! Видзӧда выль узьлан кӧлуй вылӧ, а сійӧ, вӧлӧмкӧ, коми - "Чӧскыд Ун" гижӧма. Ок и чӧскыд жӧ унъяс кута вӧтавны! Та кындзи на, Выль воӧн чолӧмалігӧн Надюк козьналіс лёк вӧтъяс куталантор. Ачыс вӧчӧма!)) 

Р.S.: А узя ме чӧскыда! Унджык кӧ эськӧ та вылӧ кадыс вӧлі на.

"АНЬЯСЛӦН" ВОЙНА АСЛАС СЕРА...

   Корсьысим Юлюккӧд  тайӧ небӧгсӧ Сытывкарса вузясянінъясысь. Эз сюр. Королеваӧй лыддьӧма нин вӧлі сійӧс, да меным окота жӧ лоис тӧдмавны аньӧн висьталӧм Ыджыд тыш йылысь, сетлыны лыддьыны небӧгсӧ мукӧдъяслы… Арнас кытшлалi Россия Лунвывті. Светлана Алексиевичлӧн «У войны не женское лицо» мойвиис ньӧбны Нальчик карысь. 

    Тайӧ небӧгсяньыс заводитчӧ Светлана Алексиевичлӧн «Голоса Утопии» художественно-документальнӧй цикл. Вуджӧдӧма гижӧдсӧ нин кызьысь унджык кыв вылӧ. Светлана Алексиевич чукӧртӧма уна-уна висьт, кодъясӧс гижис олӧмыс да война. Ыджыд тыш кад йылысь тані висьталӧны войнаын служитлӧм аньяс.

    Кыдзи гижӧма небӧглӧн медводдза листбокын, Ставмирса мӧд война дырйи нывбабаяс вӧліны став сикас войскоас. Англияса армияын вӧлі 225 сюрс ань, америкасаын – 450 – 500 сюрс, германиясаын – 500 сюрс нывбаба… Сӧветскӧй армияын тышкасис миллион гӧгӧр ань…

    Светлана Алексиевич петкӧдлӧ тӧдса нин война йылысь тӧдтӧм аслыспӧлӧсторъяс. Вайӧда авторлысь мӧвпъяс: «Писали мужчины и о мужчинах – это стало понятно сразу. Всё, что нам известно о войне, мы знаем с «мужского голоса». Мы все в плену «мужских» представлений и «мужских» ощущений войны. «Мужских» слов. А женщины молчат… Когда женщины говорят, у них нет или почти нет того, о чём мы привыкли читать и слышать: как одни люди героически убивали других и победили. Или проиграли. Какая была техника и какие генералы. Женские рассказы другие и о другом. У «женской» войны свои краски, свои запахи, своё освещение и своё пространство чувств. Свои слова. Там нет героев и невероятных подвигов, там есть просто люди, которые заняты нечеловеческим человеческим делом. И страдают там, не только они (люди!), но и земля, и птицы, и деревья. Все, кто живут с нами на земле. Страдают они без слов, что ещё страшнее».

    Окота ставнас небӧгсӧ висьтавны, ӧд тані дзонь мир, код йылысь ме водзынджык эг на тӧд, код йылысь унаӧн оз на тӧдны, но  бурджык аслыныд лыддьыны. Быд листбок – синва… Но тайӧ ставсӧ миянлы быть тӧдны.

   Тані унатор. Фронт вылын вӧвлӧм аньясысь ӧтдортчылӧмаӧсь, зонъяслӧн мамъяс эз окотитны, медым налӧн пиясныс босьтісны гӧтырӧ служитлӧм нывъясӧс.Война бӧрын мукӧд нылыслӧн лоӧма вир рӧм вылӧ, гӧрд рӧм вылӧ, аллергия. Аньяс казьтылӧны, кыдзи найӧ и фронт вылын кӧсйисны лоны нывъясӧн. Вӧчлісны вещмешӧкъясыс юбкаяс. А Германияын нин нывъяс веськалӧмаӧсь шляпаяс вузасянінӧ, быдӧн пуктӧма юр вылас мича шляпа да пукса узьӧма. Позис пӧ босьтны эськӧ найӧс, но кузь туяд нопйыд и сідз пыр сьӧкыд... Сьӧлӧм шымыштана уна висьт тані. И быдӧнын дой, синва…

     Пасйышта на небӧгысь бӧръя кывъяссӧ «…Не может быть одно сердце для ненависти,а второе – для любви. У человека оно одно, и я всегда думала о том, как спасти моё сердце. После войны долго боялась неба, даже поднять голову к небу. Боялась увидеть вспаханную землю. А по ней уже спокойно ходили грачи. Птицы быстро забыли войну…» Тамара Степановна Умнягина, гвардии младший сержант, санинструктор.