SANTA BARBARA

Ыркыд нима жар кар… Тайӧ тані медся тыдалана либӧ, стӧчджыка кӧ, медкылана лӧсявтӧмторйыс. ©

   Та-та-та-там!!! Та-та-та-там-там!!! Пельын юргӧ ичӧтдырйи на вежӧрӧ сатшӧм шылад. «Санта-Барбараӧн» сэк ворслывлісны мамӧлӧн садъяс челядь, менам школаса ёрт Андрейлысь каньсӧ шуисны Джинаӧн, а кодлыськӧ кӧзаписӧ ли ӧшсӧ – Мейсонӧн (но ме ог нин куж дум вылӧ уськӧдны, кытысь тайӧ кывлі)…

    Мыйла другысь юрам воисны татшӧм казьтылӧмъяс? Мый лӧсявтӧмторсӧ ме бара казялі? А со мый! Кавказса карын, буретш кӧні ме ӧні ӧбретайтча (удорасаяс ногӧн), эм Санта-Барбара район. Кытысь татшӧм нимыс? Сэтчӧс дона коттеджъясын пӧ олӧны «медгӧль» йӧзыс. Та вӧсна кар юкӧнсӧ тадзи и нимтӧмаӧсь. =) 
   Санта-Барбара, Дружба да Вокзал кындзи тані нӧшта эмӧсь Сахалин да Шанхай. Чайті, мый тайӧ инъясыс тані «овмӧдчӧмаӧсь» сэтшӧм жӧ сямӧн, шуам, кыдзи и Сыктывкарын Париж… Но татчӧс йӧз шуӧны, мый карлӧн тайӧ юкӧнъясыс прӧста меститчӧны кӧрт туй сайын. Сійӧс вуджигӧн медводз веськаланныд Сахалинӧ, а сэсся нин – Шанхайӧ. Ог тӧд, дерт... Меным век жӧ кажитчӧ, мый збыль помкаыс пыдынджык. Но ме тайӧ юалӧмсӧ туяла на!
   А неважӧн тані «поздысис» Сыктывкар! Но… та йылысь тӧдӧ сӧмын пара морт на. =) Тайӧ инсӧ тадзи нимтіс Тіян тӧдса! Но... кодлсь гижӧдсӧ тай ӧні лыддянныд.)) 

 

Кор ме восьлала тайӧ туй юкӧнтіыс, менам юрын быттьӧкӧ мыйкӧ кукривтчылӧ, и ме веськавла медрадейтана карын медрадейтана уличаӧ – Коммуна вылӧ! А Ті тайӧс он казялӧй?

РУБ НЕ РУБ...

    Ыркыд нима жар кар… Тайӧ тані медся тыдалана либӧ, стӧчджыка кӧ, пельӧн медкылана лӧсявтӧмторйыс.=)
    А нӧшта...

   Орчча станицаысь тӧдсаяс колян во на шензьӧдлісны, мый налӧн сиктын оз ов 1 ур (копейка). Дерт жӧ, татшӧм политикаыс вузасянінъяссянь… Сэні войтырлысь ни оз корны ньӧбӧмторйысь 1 ур дона сьӧмпас, ни оз босьтны. Та понда 1 урыс тані вошӧма!

   А мекӧд тӧрыт лоис со мый. «Магнит»-са кассаын менсьым корисны 251 шайт. Кӧсйи вежны сьӧмӧс да нюжӧді 500 чӧлкӧвӧй. Вузасьысь юалӧ:
- А руб эм?
Мися:
- Сюрӧ!
Ӧкті руб: 50 ура сьӧмпас, да витысь 10-а. Пукті.
Ныв бара:
- А руб эм?
Ме:
- А тайӧ мый, абу руб???
Сійӧ:
- Но коді сэсся менсьым тайӧ босьтас?! – да ачыс корсис руб да кыкъяса сдача...

Шар синмӧн петі лавкаысь. Мыйла, сідзкӧ, вӧчӧны 10 ураяссӧ, оз кӧ нин позь наӧн вӧдитчыны... Ме век жӧ чайта, мый абу быдлаын тадзи, а татшӧм уджалан сямыс торъя мортлӧн.=)

ШОНДІӦН СЫВЪЯЛӦМ КӦДЖ

«Крым миян! Крым мия-а-а-а-ан!»,  - йӧлӧгаӧн тайӧ юӧрыс паськаліс канмулӧн быд пельӧсӧ. Кык во сайӧ нин колис, а йӧлӧгаыс пыр на тадзи сёрнитӧ…  Россияса быд кага  нин, кӧнкӧ, тӧдӧ, мый Крым – миян. Вот и бур! =)

Тавося гожӧмӧдз тшӧкыда мӧвпалі, кутшӧм эськӧ сійӧ «миян Крымыс», кутшӧм сэні саридзыс, шондіыс, сынӧдыс…, да и ёна-ӧ сійӧ миян… А со тӧлысь да джын сайын усис шуд ставсӧ аддзывны ас синмӧн! Юкся, кутшӧмӧн менам вежӧрын да сьӧлӧмын колис  шондіӧн сывъялӧм тайӧ кӧджыс…

  Сора (июль) тӧлысьын меным мойвиис уна ветлыны машинаӧн. Тайӧ кузь туйсӧ венігӧн (Сыктывкар - Удора - Сыктывкар - Войвыв Кавказ - Крым - Войвыв Кавказ), ме нуӧді неыджыд туялӧм.  Менӧ бура тӧдысь йӧз шензясны, но да… Туялі заправкаясвывса биарулысь донсӧ. И со, мый ме казялі. Медся донтӧм сійӧ Сызраньын (11-13 шайт), а медся дона… Тӧдмалӧй, кӧні? Дерт жӧ, Комиын да Крымын – ӧти литрысь 19 шайт гӧгӧр! 

Крым серти ставыс гӧгӧрвоана. Сэні ӧні ставыс зэв дона. Ӧд Россияысь  вузаланторсӧ паромӧн вуджӧдӧмысь босьтӧны уна сьӧм. Шуам, ми вуджӧдім легковушканымӧс 1700 шайтысь. Та кындзи автоын пукалысь быд мортысь на мынтім 150 чӧлкӧвӧйӧн. А со фураясысь пӧ босьтӧны 50 000 шайтӧн… Таысь и донъясыс ыджыдӧсь…

Крымсаясӧс жаль лои эз сӧмын биару понда… Медводз, сэні абу ва. Ме олі саридз дорсянь 50 километр сайын, Партизаны сиктын. "Миян" керка бокын вӧлі 2 скважина. Ӧтиыс уна гӧсьтнад косьмис. Мӧдыс, йирджыкыс, тырмис ставмнымлы. Найӧ, кодъяс оз вермыны судзӧдчыны ваӧдз сьӧм абутӧм вӧсна, либӧ сы вӧсна мый ваыс АБУ, виччысьӧны кор налӧн керкаясӧ 2 час чӧж кутас воны ва. А тайӧ овлывлӧ ӧтчыдысь 2 луннас. Кыдз шуласны, лишнӧйысь ки ни юрси он мыськы. А удж абутӧм да ичӧт удждон вӧсна унаӧн олӧны скӧт видзӧмӧн да градвыв пуктас вӧдитӧмӧн.  А огуречыдлы ваыд уна колӧ… "Миян" керкаса кӧзяинъяс, гӧтыра-верӧса, весиг зыксьыштісны, сы вӧсна мый Галя тьӧт кӧсйис кисьтавны голландияса ӧмидз куст.)) Коді мыжа? Кыдзи шуӧны асьныс сэтчӧс олысьяс, Украина пӧ тупкис крымсаяслы дуб ваа канал.  Мед пӧ ватӧг джагаласны, бурджык пӧ лишкасӧ саридзӧ кисьтыны.
     А нӧшта ӧти тӧдса уджалӧ Коктебельын мичмӧдчан салонын. Украина дырйи пӧ луннас вӧлі ас зептӧ 2000 шайтсӧ нажӧвитам (рубъясӧн локтысь йӧзлы гривнаа донъясыс вӧлӧмаӧсь вывті ичӧтъясӧн), а ӧні пӧ весиг арендаысь нинӧмӧн вештысьнысӧ. Ныв элясис: «Сьӧмтӧг локтӧны шойччыны! Абу кӧ сьӧм, эн и лок!» Ну да… 15 000 - 20 000 шайт да ичӧтджык удждонсьыд быд руб арталӧмӧн Лунвылад бурдӧдчыны ветлігӧн, дерт нин, он мун сынасьны да гыж вӧчны сэтчӧс салонъясӧ. Но ме вензьыны анькӧд эг кут. Збыльысь сьӧкыд налы… Да и мукӧд шойччысьыс пӧ шырсьӧмысь 400 шайт мынтытӧдз на медводз няйтӧн пӧ кисьталасны оз сӧмын салонсӧ, но и ставнас курортсӧ… Сервис пӧ некутшӧм тіян абу… 
      Ялтаын вывті уна йӧз да машина. Тайӧ карсӧ ме нимті лабиринтӧн. Аддзан «Ласточкин гнездо», а воӧдчыны сы дорӧдз он вермы… 

Туй индӧдъяс эмӧсь. И меным тайӧ ёна кажитчис… Но лабиринт – лабиринт и эм… Юалім ӧти мужичӧйлысь, а мортыс быттьӧ оз кыв. Ми: «Кыдзи воӧдчыны?...» А сійӧ видзӧдӧ миян синъясӧ, оз кывзы ни кыв оз сет шуны: «Ньӧб менсьым наклейка, ньӧб наклейка»… Лунся Ялталӧн руыс дзик сьӧлӧм вылам эз во, а вот рытсяыс… ))

            Мый меным кажитчис Крымын? Саридз… Менам чайтӧм серти, Сьӧд саридзыс сэні шоныдджык Краснодар крайын серти. Татшӧмасӧ ме ваын эг на ышмавлы )), кӧть и быдми медся мича да сӧстӧм Мозын ю дорын, кӧть, позьӧ шуны, ичӧтсянь кужа варччыны... Матраскӧд венласьӧм кындзи ме колян во серти ёна бура нин суналі маскаӧн, судзӧдалі ракпаньяс, ме велӧдчи сулавны ваас ки вылын! 

            Нӧшта ме Крымын пӧттӧдз сёйи персик! Челядьдырйи персикысь компот вӧлі менам медрадейтана чӧсмасянторйӧн. Но татшӧм унаыс меным некор эз вичмыв! Колодильникын со эм ӧти, да оз нин ков весиг. ))

            Сёрнитны кӧ сёян йылысь, сэні пыр юӧны копе: асыв, лун и рыт. Менӧ сэні шуӧны вӧлі «чай радейтысьӧн». Радейтны сійӧс ме и мукӧдъясӧс велӧді. А нӧшта меным, «сыроедкалы», мойвиис чӧсмасьны быд сикас сырӧн, весиг «жвачкаӧн» (сывдӧм сырсӧ тадзи нимтӧны, мед сійӧс сёйисны челядь).))
          А медся ыджыд озырлуныс Крымын, кыдзи и быд мукӧдлаын, сэтчӧс войтыр! Меным мойвиис ёна сёрнитны да ёртасьны крымса тотаракӧд. Уна сьӧкыдлун вичмылӧма тайӧ войтырыслы Сталин кадӧ… Менам выль тӧдсалысь дед-бабсӧ ыстылӧмаӧсь Урал дорӧ, Перым крайса Красновишерскӧй районӧ. Найӧ венӧмаӧсь став мытшӧдсӧ, а кор сетӧмаӧсь позянлун петны сэтысь, вуджӧмаӧсь медводз Войвыв Кавказӧ, а сэсся и бӧр Крымӧ, но мӧд сиктӧ нин. Став сьӧкыдлун вылас видзӧдтӧг тайӧ йӧзыс видзӧмаӧсь чужан кывнысӧ (чужан сиктса сёрнисикаснысӧ), культуранысӧ… И со, мый ме казялі. Йӧз, кодъясӧс ичӧтсяньныс велӧдӧны пыдди пуктыны верстьӧясӧс, традицияяс, чужан кыв, культура, кодъяс уджавлӧмаӧсь видз-муын… Найӧ быдмӧны вежавидзысьджык йӧзӧн… Но быть колӧ буретш ВЕЛӦДНЫ став тайӧ пыдди пуктӧмас, кыдзи и ВЕЛӦДНЫ нимкодясьны вӧр-ваӧн, йӧзӧн…
        А со  латуньысь 1927-ӧд воӧ мастер К. Яниӧн вӧчлӧм тайӧ дозмукъясыс кӧзяйканыскӧд (сылӧн приданнӧй) депортируйтчылӧмаӧсь Войвылӧ да бӧр воӧмаӧсь гортаныс. Найӧс семьяын донатор моз видзӧны.

            Тайӧ шойччӧмыс вӧлі медся шоныдӧн… Лунъясыс кык пӧв озырджыка кольӧны, кор тэ сёрнитан йӧзкӧд, ӧтлаын накӧд пуан «сыр-жвачка»,  ӧктан персик, велӧдан выль ёртъястӧ юны копе пыдди тшай…, кор юксян накӧд аслад сьӧлӧмӧн...

СУПЕРМОРТ???

  Блогӧй нитшсяліс нин... Збыль вылас кӧ, ме быд вежон кӧсъя мыйкӧ гижыштны татчӧ. Но вежонсӧ вежӧ мӧд, коймӧд и...сідзи водзӧ... Кывтӧ-визувтӧ олӧмыс. «Ӧуввезса войтыр» ногӧн кӧ, мукӧддырйиыс пӧ ми мӧвпнымӧс вӧчам быдса олӧм чӧжся кӧсйӧмӧн, кӧть эськӧ збыльмӧдны сійӧс позьӧ ӧти вежонӧн. Унаторйын и ме татшӧм жӧ...

   Вот висьталӧй, сдайтлінныд-ӧ Ті коркӧ вир? Ме чайта, мый унаӧн вочавидзасны - «эг», кодкӧ - «да, некымынысь», и сӧмын ӧткымынӧн менам тӧдсаясысь вӧчӧны тайӧ сэтшӧм тшӧкыда, кыдзи позьӧ урчитӧм индӧдъяс да дзоньвидзалун серти.

   Медводдзаысь ме вӧлі донорӧн..., кыдзи эськӧ шуис менам велӧдысь Раиса Ивановна Вагнер, "важ том дырйи". Тайӧ вӧлі студенталігӧн на 2011-ӧд вося гожӧмын! Сэк ме вӧлі Тверскӧй обласьтын "Селигер" том йӧзлӧн лагерын. Вир босьтан станцияыс воліс вӧрӧдзыс, кӧні ми олім! Ветлім Таня ёртӧйкӧд. Миянлысь босьтісны 450 мл. Менам дзоньвидзалун вылын тайӧ некыдз эз тӧдчы. А мый вӧлі сьӧлӧмам, ме ӧнӧдз на помнита! Сэк ме кылі ачымӧс (кора прӧшша англо-коми кывъясысь, но окота шуны тадзи) супермортӧн, Donor Sapіens-ӧн, кыдзи вӧлі гижӧма миян футболкаяс вылын. Да, ме некодӧс эг петкӧд биысь, некодӧс эг тупкы пельпомнам пуляысь (Ен мед видзас), но ме отсалі кодлыкӧ бӧр сувтны кок вылас да овны! Шуӧны тай асьтӧ пыдди пуктӧм йылысь. Меным кажитчӧ, мый татшӧм здукъясас, кор тэ юксян дзоньвидзалуннад, тайӧ медвынаа петкӧдчӧ...

  Сыктывкарын ме ветлі жӧ во 4 кымын сайын вир босьтан республикаса станцияӧ. Но сэк ме вирӧс эг сдайт, сы вӧсна мый, вӧлӧмкӧ, лёка дасьтыси лоӧмтор кежлас: сёйи рытнас госатор. Сэк жӧ шуисны, мый абу кӧ менам карса прописка, станцияӧ локтӧдз колӧ босьны удж вылысь справка, кӧні гижӧма, дыр-ӧ ме нин тані зіля.

  Справкатӧ босьті, но эг и ветлы сэсся. Пыр кутшӧмкӧ помка сюрӧ...

  "Приступ патриотизма" (тадзи шуӧ менам Женя нывъёртӧй) овлӧ сэк, кор кытыськӧ лыддян ли кывлан, мый ёна колӧ вир. А нӧшта на ёсьджыка тайӧ петкӧдчӧ, кор неминуча суӧ тӧдсаясӧс. Танюк Кирпиченко висьталӧ, кутшӧма сійӧ олӧ да бурдӧдчӧ онкошӧринын аслас дневникын. Доноръяслӧн войтыркостса лунӧ Таня аттьӧавліс ВК аслас лист бокын найӧс, кодъяс сетӧны вирсӧ мукӧдъяслы и сылы тшӧтш. Коді оз на тӧд, Танялӧн вирын рак... Ыджыд сьӧлӧма йӧз ӧні отсаьӧны сылы бур кывъясӧн, уджӧн, сьӧмӧн. Нывлы вермас ковмыны оз ӧти миллион шайт лы вем вуджӧдан операция вылӧ...

  Став тайӧ лоӧмторйыс ышӧдіс менӧ корны удж вылысь выль справка, колананогӧн дасьтысьны доноралӧм кежлӧ, выльлунӧ чеччыны 6 асылын да медводдзаӧн локны вир босьтан республикаса станциялӧн ӧдзӧс дорӧ. (Медводз пасъя, кӧсъянныд кӧ юксьыны вирӧн, станцияас мунтӧдз сутки эн сёйӧй госа, переча, тшынӧдӧм, жаритӧмторъяс, йӧв, кольк, вый, шоколад, финикъяс да бананъяс. Позьӧ да и колӧ сёйны варенньӧа тшай, сок, морс, компот, минеральнӧй ва, сукар да сушки, пуӧм шыдӧсъяс, ва вылын выйтӧг вӧчӧм макарон, градвыв пуктасъяс да фруктъяс. Сдайтан лунас нин асывсяньыс юӧй сакара тшай!)

   Вир босьтан станцияын медводз ме вылысь пӧрччӧдісны кӧмӧс да сетісны сланцы. Мӧд судтаын регистратураын ме петкӧдлі паспорт да справкаӧс, тырті анкета. Сэні жӧ шуисны, мый менсьым босьтасны плазма (сійӧ колӧ сотчӧм да доймалӧм йӧзлы пыртӧм вылӧ). Сэсся пыри врач дорӧ. Сійӧ мерайтіс давленньӧ, кывзіс морӧс пытшкӧсӧс, арталіс сьӧктаӧс и... Юалӧ: "Тӧданныд джуджданыдтӧ?" Мися, 176 см. А сійӧ: "Ме чайта, мый Ті ыджыдджыкӧсь!" Сувті мерайтчыны и... 178 да неуна! Вот ме и шензи! Ме чайті, мый важӧн нин ог быдмы! Сэсся мӧд кабинетын нин босьтісны чуньсьым вир, минут 5 мысти  сетісны анализ кывкӧртӧдъяс, шуисны вир группаӧс (ме ичӧтдырсянь тӧда, мый сійӧ менам медся гежӧд, и таысь мыйлакӧ любӧ =)) да ыстісны водзӧ. Коймӧд судтаын меным сетісны кутшӧмкӧ набор (кабалаяса да шприцъяса), бахилъяс да дӧратор, кодӧс сэсся колӧ вольсавны ас вылад. Вир босьтан жыръяс уна небыд кушетка-креслӧ. Гашкӧ, 10 кымын, эг артав. Медводз вӧлім кыкӧн: мужичӧй да ме. Сылысь ӧдйӧ босьтісны вир, сетісны справка да мӧдӧдісны бӧр. Менӧ видзисны 3 пӧв дырджык. Медводз менсьым босьтісны 450 мл вир, сэсся вир босьтан трубка местаас пуктісны капельница. Та костті вирӧс кытчӧкӧ нуисны, мед перйыны сэтысь плазмасӧ. Сэсся вайисны кокняммыштӧм нин мешӧк да бӧр пыртӧдісны меным плазматӧм вирӧс. Процедура чӧжыс ме видзӧді телевизор. Колӧ пасйыны, мый менӧ ӧтарӧ юасисны, ставыс-ӧ бур, оз-ӧ бергав юрӧй. Тӧждысьысь врачьяслы содтӧд майшасьӧмъяс ме эг вай =). Ставыс колис бура!

  Сэсся регистратураын меным сетісны уджысь 2 шойччан лун коран справка, "Спасибо, донор" гижӧда ручка, кассаын - бура сёйӧм, крепаммӧм да вын содтӧм вылӧ 622 шайт 60 ур.

  Но тайӧ, дерт, абу медшӧрыс. Медшӧрыс — кодлыкӧ отсалӧм, тӧдтӧм мортлы, тӧдсалы, гашкӧ... И, дерт жӧ, сьӧлӧмкылӧмъяс! Ме бара кылі ачымӧс супермортӧн... Татшӧмсяма сьӧлӧмкылӧмъясыс овлывлісны сьӧкыд зачёт-экзамен сдайтӧм бӧрын. Но абу жӧ дзик сэтшӧмӧсь. Верманныд кӧ, вот видлӧй асьныд. ))

  Но суперморталан руыс кутчысьӧ сӧмын ӧти лун. И тайӧ бур... Тайӧ - помка думыштны, мый нӧшта вӧчны, медым сійӧ руыс чужис бара, вӧлі тшӧкыдджыка либӧ оліс тэкӧд... 

Р.S.: Мӧвпала ӧні, кытысь тайӧ "суперморт" кывйыс меным... Воис жӧ тай юрӧ! "Шоныд рыт" благотворительнӧй концерт кежлӧ дасьтысигӧн "АРТ"-ысь Татьяна Логинова гижис миянлы: "Мишкаяс-супер йоз! Абу яндзим том йозсьыс!!!!!!" =)
  Но тайӧ нин дзик мӧд сёрни...

КУТАМ ОВНЫ ШУДА ОШ МОЗ ))

   Выль во паныдалігӧн пыр окота веськавлыны мойдӧ. Виччысян-виччысян, а сійӧ тэ гӧгӧр кытшовтас дай... Чайтан, мойдсӧ кутан кывны, кор лоӧны ичӧт челядь, кор кутан найӧс гажӧдны да нимкодьӧдны. )
  Таво гортнымӧс мичмӧдім эг быд во моз. И тайӧ волшебство кодьӧн жӧ лоис... Быд пыралысь шензис миян... "козйӧн". 

 

   Бадь увъяссӧ гортӧ вайис мамӧй. Козсӧ пӧ жаль. )) Тадзисӧ вӧзйылӧмаӧсь вӧчны кутшӧмкӧ моднӧй журналын, мамӧй босьтӧма тӧд вылӧ. Шуим гӧсьтъяслӧн локттӧдз ӧшлыны чальяс вылас козинъяс. )
   Нӧшта ӧтитор вӧчис Выль во пасйӧмсӧ гажаджыкӧн. Артмис сідз, мый салатъяса-чимиа пызан сайын пукалім эг сӧмын ми мамӧкӧд да ёртъяс, но и сьӧлӧмлы дона мукӧд рӧдвуж. Фотояс вывсьыс кӧ ставнысӧ лыддьыны, 30 сайӧ морт артмас.

 

  Со тадзи выльвося русӧ поздӧдім гортӧ.)) А нӧшта, дерт, зэв нимкодь вӧлі чукӧртны-гартавны матыссаяслы козинъяс да разьны-перйыны миян козьналӧмторъяс. Пӧттӧдз сералі, кор босьті киам мамуксянь ӧти козин. Тэ пӧ ӧд мишка, со тэныд мишкинскӧй лунпас (календар).

 

  Вот тадзи! Кутам мишкаяскӧд овны шуда ошпи ногӧн.)

СТАВЫС ӦНЬӦ ЛАВЛӦН КИАС!

      Эг и казяв, кыдзи талун чужис со татшӧм авантюра... 

    Письмӧаси ӧти морткӧд. Талун кежлӧ коми блог сылӧн абу на. Нимсӧ ог висьтав. Инкогнито. Шуис, кӧсъя пӧ шоппингасьны. Мися, вай да блогӧ та йылысь гиж, сӧмын юртӧм морта фото эн пукты (Ӧньӧ Лав пыртӧма шоппингасьӧм йылысь аслас гижӧдӧ буретш татшӧм серпас), а содты сэтчӧ асьтӧ выль паськӧмнад. Виччысьтӧг сійӧ меным вочавидзис: "Сӧмын Ӧньӧ Лав бӧрын!" Мися, збыль? Ме ӧд гижа та йылысь сылы. Сійӧ чегъясьыштіс да шуӧ: "Збыль. Лоас блог! Сідзкӧ, виччысям Ӧньӧ Лавсянь ход". Но медым пӧ сійӧ фото вылас быть вӧлі стильнӧй да моднӧй выль дӧрӧм-гачнас да тасманас. Вот тадзи... Тайӧ гуся мортыс кӧсйысис гижасьны мукӧд канмуясті ветлалӧм да быд пӧлӧс виччысьтӧмторъяс йылысь. Чайта, лоӧ зэв класснӧй блог!

   Гашкӧ, ті шуанныд миянӧс инкогнитокӧд шпана чукӧрӧн, кулиганъясӧн либӧ ышмалысьясӧн, но... ме збыльысь ёна кӧсъя, медым тайӧ выль блогыс чужис! Миян пыдди пуктана да радейтана Ӧньӧ Лав, чайта, тшӧтш...

МОДА... НЕБӦГ КАМОДЫСЬ...

  Кодкӧ велалӧма асывнас вӧчны зарадка, кодкӧ ӧтарӧ шпуткӧ, а кодкӧ, менам мамук моз, быд прӧст здукӧ кысьӧ. Уна-ӧ кад колӧ мортыслы, медым мыйӧкӧ велавны? Туялысьслӧн та серти уна мӧвп. Кодлыкӧ пӧ тырмӧ 18 лун, кодлыкӧ - 254. Унатор петӧ буретш серӧс-привычкасьыс.

  Лун кык сайын ме гӧгӧрвои, мый ме дорӧ кӧвъясьӧма выль серӧс. И, кӧсъя шуны, мый зэв на и бур!

  Гашкӧ, кодкӧ кывзыліс ачпас (селфи) йылысь "Ёрта сёрни" уджтасӧс. Тайӧ вӧлі моз тӧлысь заводитчигӧн. Петассӧ дасьтігас, ме дорӧ воліс... муза! Аддзи колана геройясӧс, ставыс кутіс артмыны, кыдзи кӧсъя - сэтшӧм долыд лоис. И юрӧ воисны кывъяс "Во всём мне хочется дойти до самой сути"... Корси Борис Пастернаклысь кывбурсӧ, печатайті. Листсӧ аддзис шань мойдса нывка, миян звукар Надюк. Мый пӧ лэдзин? Мися, бур кывбур, колӧ эськӧ велӧдны татшӧмъяссӧ да, школасянь юрын этшатор нин колис. Пуктылі, мися, мог во куим сайын гожӧмнас быд вежон велӧдны ӧти кывбурӧн. Кык-куим недель бӧрын дышми. Гашкӧ, гажтӧм ӧтнам вӧлі да сійӧн ли... Шуа Надюлы, а вай ӧтлаын быд вежон велӧдны кутшӧмкӧ кывбур, а пекничаӧ висьтавны ӧта-мӧдлы да уджъёртъяслы! А вай пӧ! Мукӧд радисточкаыс эз пырӧдчыны миян уджтасӧ, дышӧдчыштӧны буди а. ;) 

  Тадзи, Пастернаклӧн кывбур кындзи ми нин бура тӧдам Андрей Дементьевлысь "Никогда ни о чём не желейте", Роберт Рождественскӧйлысь "Если вы есть - будьте первыми" да "Человеку надо мало". 4 вежон - 4 кывбур. Надюк ӧні отпускалӧ, но менам нин сэтшӧма велавсьӧма велӧдны гижӧдъяс, мый ог нин вермы татӧг. Ӧні со кужа нин висьтавны Вероника Тушновалысь "Мне говорят: нету такой любви". А... планысь ӧтдор на неважӧн велӧді Николай Асеевлысь "Я не могу без тебя жить" кывбур. 

  Кывъясыс ӧдйӧ овмӧдчӧны юрын, торйӧн кӧ нин олан ичӧт жырйын да бура аддзан колодильник вылӧ ляскӧм листъяссӧ. ;)

  И сэтшӧм лӧсьыд! Ӧти-кӧ, сӧвмӧ вежӧрыд; мӧд-кӧ, бурмӧдан йӧз водзын сёрнитны кужӧмтӧ; коймӧд-кӧ, юрад пыр нин эм кутшӧмкӧ шедевр, кодӧс позьӧ висьтавны гажъяс дырйи сока стӧканъясӧн тотшкӧдчытӧдз; нёльӧд-кӧ, кодкӧ  тэсянь тӧдмалас тайӧ поэт либӧ гижӧд йывсьыс. Шуам, ме бӧрын мамукӧй велӧдіс "Никогда ни о чём не жалейте" да висьталӧ нин Сёльыбын матыссаяслы да рӧдвужлы. ))

  Ӧнӧдз на Надюккӧд велӧдім ӧткодь кывбуръяс. Позьӧ эськӧ торъяланаӧс, но сылы пыр на кажитчылісны меӧн бӧрйӧмаясыс. Уджъёртӧй эз на лок, кӧсъя та кадӧн велӧдны коми кывбур. Кутшӧмӧс вӧзъянныд? Кӧсъя, мед эськӧ вӧлі кыпыд, сьӧлӧм шонтысь, кодӧс эськӧ позис сины бур йӧзлы.

P.S.: Сэсся лоӧ отчёт!
Водзвыв аттьӧ!