четверг, 11 сентября 2014 г.

ЫСТӦЙ МАМНЫДЛЫ ФОТО

Ті ыстыланныд мамъясныдлы ассьыныд фотояс? Онӧй кӧ, ёна вӧзъя! Неважӧн на и ме тшӧтш гортӧ мӧдӧдлі гожся серпасъяс.
Менам ныр улын пыр эм комьютер, чорыд дискыс потсьӧ нин быд сикас лӧпсьыс. Тані эм быдторйыс. Но век медся окота пыравны  «ФОТО» папкаӧ. Сійӧ ловзьӧдӧ колян кадсӧ, казьтылӧ олӧмысь шуда здукъяссӧ да вунлӧм нин чужӧмъяс. Ӧти киноын кодкӧ геройясысь шуис, мый колӧ фотографируйтны став шуда здуксӧ, мед сэсся эн жалитӧй сійӧ кадръяссьыс, кодъяс эз веськавны фотоаппарат объективӧ…  
Водзынсӧ цифровӧй «мыльницаӧс» пыр сьӧрысь новлӧдлі. Ӧні мамӧлы сійӧс сеті. Аслам ыджыд зеркалка, кодӧс аскӧдыд быд лун он босьт. А телефонӧй, кыдзи шуӧ Никита воча вокӧй, «деревяннӧй». Та понда быд здуксӧ ӧні фотографируйтны ог вермы, кӧть эськӧ неважӧн и усьліс шуд велӧдчыны «GEOMETRIA ФОТО АКАДЕМИЯЫН»

Ми, том йӧз, ӧні гежӧда печатайтам фотояс, миян ӧд ставыс син улын — техникаын. Ыстӧй кӧть пара, кӧть ӧти фото мам-батьныдлы. Налы ӧд пыр нимкодь листавны муса ныв-пиукныслӧн фотояса альбом, видзӧдны налӧн чужӧм вылас, вензьыны, код вылӧ кагаыс ёнджыка ветлӧ, ропкыштны ӧнія кадся модаа дженьыд платтьӧяс ли розя джинсыяс вылӧ, петкӧдлыны тайӧ серпасъяссӧ ёртъясныслы, рӧжвужлы либӧ уджъёртъяслы. Кӧть коми йӧзыд и оз ошкыны быдтасныссӧ ни оз ошйысьны асланыс челядьӧн, кӧнкӧ пыдын лов пытшкас налы пыр окота кодкӧдкӧ юксьыштны тіян вермӧмъяс йылысь радлунӧн.
Менам мамӧлӧн Женюклӧн фотояса эм уууна альбом, ичӧтдырсяньӧй ӧнія кадӧдз. Кӧсъянныд ко мекӧд бурджыка тӧдмасьны, корлӧй найӧс мамукӧйлысь.
Неважӧн гортӧ ветлігӧн, казялі, мый менам выль альбом гортын овмодчӧма. Мамӧ шуис, тайӧ пӧ тэнад. Видзӧдлі, а кышӧд вылас… ёж. Ме, шензьӧмон:
-  А мыйла менам альбом вылам ёжик?
- Сы вӧсна мый ёжик кодьӧн мукӧддырйиыс овлан, - нюмдыштӧмӧн шаня вочавидзис мамукӧй. :))


1 комментарий:

  1. Зэв бура гижин! Тайӧ збыльтор мый фотояс вывті гежӧда печатайтам! Ме тайӧ тшӧтш сӧмын некымынысь вӧчи, а пыр кор найӧ фотояс аддза кӧнкӧ гортын, найӧ здукъяс пӧмнита. И дигитальнӧй форматъяс йылысь коді тӧдӧ - жугалӧ компутер или мый ли, а печайтӧм торсӧ тадзи оз вош.

    ОтветитьУдалить