БУР ЛУН, ДОНАЯС!

    Ставлы бур лун! Регыд Выль во! Окота став дона йӧзлы козьнавны шаньлунӧс... А ӦШЫМ тӧлысьыд татшӧм и эм:

Ӧ.дйӧ котӧртысь,

Ш.ензьӧдысь,

Ы.ззьӧдысь,

М.удзтӧдысь.

Сӧ, ас киӧн вӧчӧм выльвося козинъясысь ӧти.

  Став муса йӧзлы эськӧ козьналі, но ӧтиӧс на татшӧмсӧ вӧчи. )) Кӧть тадзи нин юктӧда ставныдтӧ радейтӧмысь вӧчӧм юанторйӧн. Гулькнитӧй быдӧн, и луныс лоӧ медся на бур!)))

ВЫН-ЭБӦСТӦМ ВИР-ЯЙ ДА КЫПЫД ЛОВ КЫЛӦМ

   "FUROR - 2014" йылысь ми нин сёрнитам колян кадын... Кымын вын сэтчӧ пуктӧма! И абу весьшӧрӧ! Та йылысь ми висьталім нин республикаса СМИлы: "Юрган" телеканаллы, "Коми му" газетлы... 

Кӧсъя сӧмын шуны, мый тавося форумыс куим вӧвлӧм письыс меным кажитчис медся шоныдӧн да медся вынаӧн. Тайӧ менам видзӧдлас. Чайта, мый тадзи артмис, сы вӧсна мый тайӧ "FURORсӧ" лелькуйтіс шань сьӧлӧма, кыпыд руа да енбиа уна йӧз. Ставӧн уджалісны ӧтув, вежавидзӧмӧн. Форум пиукным сӧмын заводитас синваасьны, а тані нин кодкӧ матыстчӧ да ланьтӧдӧ сійӧс... 

   Муӧдз копыр Помӧсдінлы да сэтчӧс войтырлы! Ачым эг ов сиктса керкаын, интернатын капитаналі, но и тані миянлы пыр вӧлі лӧсьыд. Татчӧс уджалысьяс пыр и юаласны: "Ставыс бур? Тшай, гашкӧ, кисьтыны? Абу тшыгӧсь?" А ӧти войӧ менам дона ёрт Машук нуліс менӧ, менсьым Королеваӧс да Удмуртияысь бур ныв Ленукӧс Бадьёльйылӧ пывсянӧ.

 Сёр кад вылӧ видзӧдтӧг, некод Машукъясын эз узь! Тані ми лӧсьыда шонтысим-пывсим, тшайӧн юктӧдісны, а чӧскыд пӧжас весиг аскӧд ыстісны. А! Нӧшта тані мяинлы ёна мусмис Ивашев гозъялӧн Ванюк пиныс. Жӧниклы сӧмын 2 да джын на, а коми кывйыс зонкалӧн кутшӧм сӧстӧм, а вежавидзысь кутшӧм Ванюкыс! Мед пыр тадзи и лоӧ, мед дзоньвидза быдмӧ!

"FURORса" ёртъяс зэв жӧ шаньӧсь! Менам, кыдзи и мукӧд котыртысьлӧн, прӧст кадыс дзик эз вӧв, но удитсьылӧма тай кодкӧдкӧ тӧдмасьны... Локті карӧ, а "ВКонтакте" пыр то ӧти, то мӧд аттьӧалӧ форумысь. Ёна майшаси, мый татшӧм ыджыд чукӧртчӧмъяс дырйиыс, ог быдӧнлы удит нюмдыштны, отсыштны... Таво артмис, чайта. Ачым шензя... ))

  Зато сы выйӧдз уджас пырӧдчысьӧма, мый тайӧ вежон чӧжыс висьӧдчи. И насмука, и кыза помтӧг... Та вылӧ видзӧдтӧг, меным ньӧти абу гажтӧм. Мед ёртъяс мунісны, мед нёрпала... Горшӧй бурдас, а финн-йӧгра чой-воккӧд лоӧны на паныдасьлӧмъяс, найӧ ӧд дзик матынӧсь, ӧти планета вылын олам.)) Во кежлӧ пасйим уна удж. Вӧчнысӧ, дерт жӧ, ӧтув кутам. 

  А нӧшта на кыпыд лов вылын виччысьтӧм козинъясысь. )) Ӧшым тӧлысь медводдза лунӧ вовлӧм суседкаӧй, Надюк, дзонь мешӧк Выль вося козин вайис. Тані вӧлі мича открытка, лёк вӧтъяс вӧтлантор, декупажитӧм ичӧт дӧска, варенньӧ. Ставыс ас киӧн вочӧм! А тӧрыт Женюк Удалова меным козьналіс ассьыс медводдза петассӧ - радейтана сьыланкывъяса диск. Сідз и окота челядьдырйи моз нерсьыштны мукӧд водзас "бе-бе-бе"!))

ВОЛЫ ДА НӦШТА МЫЙКӦ МЕНЫМ КОЗЬНАВ!

   Висьтавны кӧ, мый вежончӧжнас мекӧд вӧлі, удж вылӧ мунтӧдз кадыс оз тырмы, мӧд вой воас. Бурджык висьтала челядьдырысь серамбанатор.

  Локтӧма коркӧ миянӧ Сёльыбын олысь Ӧпӧнасся баб, вайӧма еджыд гӧрӧка вижовгӧрд дӧра. Тайӧ пӧ Женялы. А меным сэк ар нёль кымын на вӧлі. 

Мамӧй сылысь юалӧ:

- Мыйла вайин? Нинӧм оз ков!

Ӧпӧнасся баб:

- А сійӧ менсьым корис. Коркӧ ывлаын паныдасис да шуис: "А ме тэнӧ тӧда. Тэ Ӧпӧнасся баб. Тэ меным коркӧ чышъян козьналін! Волы да нӧшта мыйкӧ козьнав!" 

   Вот татшӧмӧн ме вӧлі нывкаӧн. Ӧні Ӧпӧнасся бабыслысь весиг чужӧмсӧ ог помнит. А еджыд гӧрӧка вижовгӧрд дӧрасьыс мамӧй вурліс меным юбка-шорты, кодӧс, гашкӧ, ӧтчыдысь и пасьтавлі, асныра ӧд! Чайта, куйлӧ кӧнкӧ сарайын ли сундукын, эз кӧ, дерт, мамӧй кодлыкӧ сійӧс сет. Выль во кежлӧ гортӧ ветлігӧн колӧ корсьлыны тайӧ аслысполӧс паськӧмсӧ. ))

P.S: А фото вылас магазинса платтьӧ. Но гӧрӧкыс, тыдалӧ, ичӧтсянь и лӧсялӧ меным... ))

КОМИ ПЕРВОКЛАШКАЯС

    Тӧрыт ветлі Сыктывкарса коми войтырлӧн конференция вылӧ. Тані висьтасисны вочӧжся уджысь, сёрнитісны карбердса посёлокъясын мытшӧдъяс йылысь. Паськыдджыка та йылысь гижисны нин инфолентаясын, и ме тшӧтш гижа уджтас. Петас сійӧ матысса середаӧ 16:06-ын "Коми йӧзкостса радио" эфирын.

  Кӧсъя висьтыштны конференция дырйи петкӧдчӧм коми кагукъяс йылысь! Сэтшӧм нимкодь вӧлі найӧс аддзыны да кывны! Чукӧртчылӧм дзик водзас кар администрацияса сцена вывсянь лыддисны комиӧн кывбур медводдза классын 6 велӧдчысь. Чайта, гогорвоинныд, код йылысь сёрниыс. Да, тайӧ найӧ, кодъяс йылысь тай во быд нин ёна сёрнитӧны. Национальнӧй гимназияын чукӧртісны 5 нывкаӧс да 1 зонкаӧс, кодъяс кутасны велӧдны коми, кыдзи чужан кыв. И со, найӧ син водзынӧсь! 

фотоыс Владимир Муравьёвлӧн

Сэтшӧм мусаникӧсь. Кодъясӧскӧ на пиысь тӧда нин. Костюк Козловкӧд да Анюк Нестеровакӧд сёрнитлі нин Челядьӧс доръян лун водзын. Найӧ висьтасисны ас йывсьыныс "Коми йӧзкостса радио" кывзысьяслы. Тусюкъяс, Ен сыкӧдӧн! Кагукъяс сэтшӧм бодера да мичаа сёрнитісны, некутшӧм роч акцент эз кыв! Ой, тшӧтш кӧсъя, медым менам ныв-пиӧй тадзи жӧ кужисны... 

Жаль, дерт, мый талун Сыктывкарын коми челядьыс миянлы дивӧ... 

ФРОНТЫСЬ ПИСЬМӦ

   Менам некымын горт. Медся «збыль» чужан гортӧй - Удора районса Сёльыб грезд. Тӧрыт на сэтысь локті. Гортын ёна лӧсьыд… Тані некытчӧ оз ков котӧртны, абу ӧтуввез ни сотовӧй телепон, а нӧшта тані «олӧ» важыс, вӧвлӧм олӧмыслӧн руыс. Сиктсаяс видзӧны сійӧс казьтылӧмъясын, фотоясын, письмӧясын…

  Миян гортын эм тылӧс куд, пуысь вӧчӧм. Сэні видзам важ документъяс да некымын важ письмӧ. Тані Анэй баб (мамӧлӧн мамыс) киӧн гижӧм сьыланкывъяса тетрадь, кутшӧмкӧ ёртсянь 1957-ӧд воӧ Германияысь воӧм письмӧ. Кутшӧм мичаа сэк гижлӧмаӧсь письмӧяссӧ… Дерт, гашкӧ, абу шыбӧльястӧг, но мича кывъясӧн, пыдди пуктмӧн, сьӧлӧмкылӧмъяссӧ дзебыштӧмӧн, но сідзи, медым лов вылӧ воысь морт ставсӧ гӧгӧрвоис.

   А нӧшта меным мойвиис аддзывны фронтсянь письмӧяс. Гижис найӧс 1909-ӧд воӧ Сёльыбын чужлӧм Ванеев Семён Андроникович муса аньлы, Ванеева Марина Флегонтовналы, Мария Флегонтовна менам прабабӧйлӧн чойыслы. Семен дед вӧюйтӧма Ыджыд тышын война заводитчӧмсяньыс помӧдзыс. И весиг вермӧм бӧрас сійӧс абу на пыр лэдзӧмаӧсь гортас. Ловйӧн кольӧм мукӧд салдатъяскӧд сійӧ кыпӧдӧма киссьӧм каръяс Брест да Минск. Фронтовик ошйысьлӧма, война дырйи пӧ ставныс гӧгӧр пӧгибнитлісны тышъясын, а ме пӧ пыр ловъя коля…

  Письмӧяссӧ гижлӧмаӧсь куим пельӧсӧн кусыньтӧм кабалаторъяс вылын. На вылын пырджык «полевая почта» пас да «просмотрено военной цензурой» печать. 

Гижӧдъясыс рочӧсь. Комисӧ цензураыс эз лэдз ыстыны. Эм эськӧ письмӧ чукӧрас ӧти коми, но сійӧс видлӧма ыстыны фронт вылӧ Марин баб. Гижӧдыс бӧр воӧма. Ань пасйӧма, мый фермаын 40 ыжыс во чӧжнас чужтӧмаӧсь 130 балюкӧс; мый магазинӧ вайӧмаӧсь вина, но сетӧны сійӧс сӧмын вӧралысьяслы, доймалӧмаяслы да красноармеечьяслы, а аньяслы «колӧ эськӧ шогсӧ пальӧдны, но Пиля Вань оз сет».

  Фронтсянь гижӧдъясын ёнджыкасӧ сэтчӧ воысь письмӧясысь аттьӧалӧм, сиктса олӧм серти юалӧмъяс. Ас олӧм йылысь пырджык ӧти сёрникузя, менам пӧ ставыс бур, важ моз, ловъя.

  Медъёна менӧ шензьӧдісны кабалаясыс, кодъяс вылын гижлӧмаӧсь письмӧяссӧ. Кутшӧмъяскӧ лёкиник листтор вылын, кутшӧмъяскӧ граната улысь ли гранатаӧн вӧдитчыны велӧдан кабала вылын, а кутшӧмъяскӧ врагӧс венны ышӧдысь серпасъяса  карточкяс вылын. Со, кутшӧмӧсь. 

КАРАОКЕ, НЮЗЬ-МОНСТРЪЯС, ЗОСИМА ВАСИЛЬЕВИЧ ДА "ФУРОР"...

    Талун нин четверг. Аски гортӧ. Ураааа!!! Гожӧм шӧрсяньыс нин Сёльыбын эг вӧв...

   Вежон быд мыйкӧ войӧдзыс вӧчи. Арталі, кымын кад ме луннас колляла компьютер сайын да весиг повзи! Тадзи оз позь! Колӧ шойччыны техникасьыс. 

  Вот и шойччи воторникӧ. Ветлі коми филолог ёртъяскӧд караокеасьны. Сьывны ёна радейта. Дерт, ог музыкант моз льывкйӧдлы, но сьӧлӧмсянь. Миянлы весиг кокӧначасисны! Вот!

 

                                   

   Выльлунас вӧлі "стратегическӧй объектын" - Коми наука шӧринса биология институтын. Ооо! Тані зільӧны генийяс! Медводз Людмила Владимировна Тетерюккӧд сёрниті гежӧда паныдасьлысь быдмӧгъяс йылысь. А бӧрынджык... Вӧлӧмкӧ, сійос кыскӧ коми культураӧ. Висьталі аньлы "Коми йозкостса радио" йылысь, коми блогйысьяс, кыв лаборатория, том коми войтырлӧн "МИ" котыр йылысь... Ачыс сійӧ юаліс, гашкӧ пӧ, кодлӧнкӧ эм сканер пыр лэдзӧм Карой Редеилӧн "Зырянские тексты" небӧг. Сэні пӧ туялысьлӧн менам батькӧд фото эм. Сьӧда-еджыда копияыс Людмила Владимировналӧн эм, но сэні чужӧмъясыс лёка тыдалӧны. Сэсся пыралі видзаасьны важ тӧдса Елена Николаевна Патова дорӧ. Сійӧ туялӧ нюзьяс! Петкӧдліс меным ва быдмӧгъяслысь микроскопъяс пыр вӧчӧм фотояс. Гашкӧ, ті он эскӧй, но тайӧ дзонь муюгыд! Сэтшӧм мича серпасъяс. Ме эськӧ на вылӧ видзӧдӧмӧн мича гижӧдъяс чужті... Нюзь ӧти сикаслӧн пытшкӧсыс майтӧгысь гадьяс быттьӧ, модлӧн - нидзувъяс, коймӧдлӧн -  лэбач гӧн, а нёльӧдлӧн - мультфильмысь монстръяс кодь! 

    Тайӧ, дерт, абу сійӧ серпасъясыс, но кодъясӧс ме аддзылі, мичаджыкӧсь на. 

   Середаӧ ветлі Коми каналан сӧветӧ. Сэні казьтылісны сё во сайын чужлӧм тӧдчана коми политик Зосима Васильевич Паневӧс. Зэв бур мортӧн сійӧ вӧлӧма... Шань мортӧс пыдди пуктӧмӧн ӧти войӧн и гижи сы йылысь уджтас. Кывзӧй! Тіянлы кажитчас!))

  Тадзи и колис джын вежоныс. Быд лун и вой нокси на и "ФУРОР" форумса делаясӧн. Мууудзи... Кор нин пукся гежӧда ветлӧмнас нималысь "Сыктывкар-Кослан" поездас да вода плацкарт вагонлӧн джаджйӧ... 

КОТЫРТЫСЬ - КОТӦРТЫСЬ...

  Котыртысь - тайӧ пыр кытчӧкӧ котӧртысь... Быд сикас чукӧртылігӧн буретш сылы вичмӧ медуна уджыс, тӧждыс, вензьӧмыс, а такӧд тшӧтш ошкӧмыс да пинялӧмыс... И вӧвлінныд кӧ ті асланыд олӧмын котыртысьӧн кӧть сёысь, некор эн дойдӧй кывйӧн мӧд котыртысьӧс. Гашкӧ, чукӧртчӧмсӧ дасьтӧмас смелмӧдчисны босьтчыны сӧмын ӧткымынӧн. Гашкӧ, налӧн тайӧ ставыс вӧлі медводдзаысь. А лоны котыртысьӧн - тайӧ дзонь наука!

  Артмис кӧ сідз, мый ті обшественник, тіянлы быть пыр мыйкӧ котыртны. Быд лунся ичӧт паныдасьлӧмъяс кындзи овлӧны и ёна ыджыд чукӧртчылӧмъяс. Том коми войтырлӧн "МИ" котырлӧн медыджыд татшӧмторйыс - финн-йӧгра том войтырлӧн "FUROR" форум. Таво сійӧ лоӧ коймӧдысь нин, но воысь воӧ чайтсьӧ, мый медводдзаысь ставсӧ вӧчан. Ыб, Сыктывкар... Таво нин Помӧсдін! 

Форумыс лоӧ на вӧльгым тӧлысь помын - 28-ӧд-30-ӧд лунъясӧ, но талун нин сійӧ узьны оз сет... Мӧвпалан, кыдзи вӧчны сідз, медым локтісны чужан кывъяс понда збыльысь ёна висьысь том йӧз, медым ставныслӧн артмис кольлыны бокӧ велӧдчӧм, удж, медым сюрисны секцияясӧн тӧлка да мукӧдсӧ бурӧ ышӧдны кужысь кывкутысьяс, медым ставлы ставыс тырмис, медым быдӧнлы вӧлі лӧсьыд да шоныд миянкӧд... 

  Кык воддза вонас миян мыйыс сӧмын нин эз вӧв! Шуам, водзвыв висьтавтӧг, дзонь лун вылӧ водзджык локтіс ылі Мордовияысь делегация (а кыдзи и овмӧдны); мыйлакӧ "МИ" паса флешкаяс форумводзса вояс кольлісны типографияын, а найӧс на колӧ вӧлі пуктавны папкаясӧ; Яналӧн пуксьӧма ёна колана сё-милльон номера телепоныс (ӧні пӧ аскӧд новлӧдла зарадкасӧ); сухпайяс йылысь ог нин нинӧм шу... Таво котыртысьыс воддза вояс серти ёна унджык. Аттьӧ таысь восьса сьӧлӧма, шань да водзмӧстчысь помӧсдінсаяслы! Чайта, ӧтвылысь миян ставыс артмас! 

  Талунъя рытнас лукйыси документъясын. Уна-уна кабалаын ковмис гудйысьны. Дивӧ! Кызь витӧ на абу, а документыс дзонь зорӧд! Збыль тай шуӧны, мый кабалатӧг тэ некод. Так вот, кодйысигам, дерт, ки улӧ сюрисны и "МИ" да "FUROR" нима папкаяс. На пиысь ӧти, "FUROR - 2012" весиг восьтывтӧм! Серамӧй весиг петіс.)) Сэні, вӧлӧмкӧ, коми кывъяса закладка, миннацлӧн "Республика Коми - территория межнационального мира и согласия" диск... Ачым ӧд папкаяс чукӧртысьяс пӧвстас вӧлі, а ог нин помнит, мый татшӧм озыр сэк вӧлӧма "портпельным". 

Форум дырйиыс кадыс нимкодясьны козинъясӧн, дерт, эз вӧв. А сы бӧрын кывкӧрталан ноксьӧм... Пыр тадзи котӧртан, котӧртан... А борас сэсся мӧвпалан, удиті-ӧ ме сёрнитыштны сыкӧд, нюмдышті-ӧ талы, кужи-ӧ вочавидзны... Мед тавося "FUROR" дырйиыс ставтор вылас тырмас кад! Мед став миян котӧртысь котыртысьыслы Енмыс сетас сям, терпенньӧ да вын! "МИ" ёна шудаӧсь бара паныдавны финн-йӧгра чой-вокнымӧс! Ёна-ёна тіянӧс виччысям, донаяс!

P.S: Узя нин, а восьті дисксӧ. Гашкӧ, мыйсюрӧ ковмас босьтны тавося форум кежлӧ. 

Аски Королеваӧйкӧд кутам гижны "ТУТУРУТУ" гаж кежлӧ сценарий...

КОРОЛЕВА - "ЖЕНА КНЯЗЯ"

  Студенталігӧн на, витӧд курсын университетын велодчигӧн, миянлы Юлюккӧд либӧ талунъя Королевакӧд, код йылысь ті нин тӧданныд, мийвиис ветлыны Финляндияӧ. Сэні ми велӧдчим гижны проект-уджтасъяс. Уджалім уна... Весиг карсянь ылӧ миянӧс овмлдісны, мед нинӧм эз торк велӧдчӧмнымӧс. Вердісны зэв чӧскыда, но миян ёна бырис гаж (Удораын тадзи шуӧны)... шоколадысь! Кор котырнымӧс нуӧдлісны Тампереӧ, вузасянінысь ми пырысь-пыр корсим "Сникерс" да зэв чӧскыда сёим. 

  Видзӧда уна тыа канмуын вӧчӧм фотояс вылӧ - Юлюклӧн быд лун выльнога юрсиыс сыналӧма. А сыкӧд ӧти фото улын (тайӧ фото улас) гижӧма "жена князя". 

Кыдзи чужис тайӧ кывтэчасыс? Ме ли, Юлюш ли тадзи нимтім сылы меӧн кыӧм кӧса. Татшӧм лӧсьыдасӧ "жена князя" юрси новланногыс лосялӧ сӧмын тайӧ Королеваыслы. И кынысӧ сійӧс буретш тадзи дона нывлы кужа сӧмын ме. 

  Быттьӧкӧ та йылысь сӧмын ми и тӧдім.  А ӧтчыдысь гажӧдчам вӧлі Маришкалӧн чужан лун вылас. Панім кутшӧмкӧ ворсӧм. Стӧча ог нин вермы казьтыштны. Ворсігас кодкӧ юаліс: "Мый тіян казьтылӧ Юлялӧн (тайӧ вӧлі королевствуйтӧдзыс на) причёскаыс?" "Жена князяӧс!", - горӧдіс Юлюклӧн Корольыс.)) Кывлӧма тай кытыськӧ...

  Буретш тӧрыт на, водз асывнас, ме дорӧ воліс менам муса ёртукӧй, Королеваӧй. Муна пӧ Пивкин дорӧ "Вочакыв" уджтас вылӧ, шуис локны 8:45 кежлӧ. Эфирыс пӧ 9:00-ын нин. Женюк, телеканалса шыльӧдысь-мольӧдысьыс сыналас ли оз ли, а меным колӧ "жена князя"... Кыи "фирменнӧй" кӧсаӧс. Александр Григорьевич пӧ ёна шензьӧма, кытысь Юля татшӧм юрсинас локтӧма.  

МОДЕЛЯВНЫ

  Кокни-ӧ лоны модельӧн? Дерт, сьӧкыд. Ёсь диетаяс, ас бӧрся сюся видзӧдӧм, конкуренция венӧм, ставсьыс лӧсьыдӧн да медкажитчанаӧн лоны зільӧм... Подиумъясті ветлысьяслы торйӧн нин уна вичмӧ, чайта. Та йылысь ме зэв этшатор тӧда. 

   Фотомоделявны абу жӧ кокни, кӧсйӧ кӧ фотограф вӧчны збыльысь бур удж. Ас серти тӧда. Фотокурсъяс вылын велӧдчигӧн, быдӧнлӧн миян пиысь вӧлі фотостудияын асшӧр час. Модельясӧс ми корим асьным. Меным отсасис менам бур ёртук, нюмъялысь да мичаник Арменуи. 

Аслыспӧлӧс да экзотичнӧй нима коми нывкӧд олім университетса ӧтуволанінын ӧти жырйын и некор эг пинясьлӧй, сы вӧсна мый ӧта-мӧднымӧс пыдди пуктім, отсасим да ёна радейтім, кыдзи и ӧні. 

  Так вот, кори студияӧ бур ёртӧс, кодӧс важӧн нин тӧда, но кыдзи сэсся шуис меным Армениум, сылы вӧлі сьӧкыд, сы вӧсна мый поліс торкны менсьым уджӧс. А ме майшаси, мед эськӧ сылы бурджык фотояс лоӧны. Вӧлӧмкӧ, весиг матысса йӧз оз пыр бура воссьыны фотограф-ёрт водзаныс. Тані колӧ лоны психологӧн...  И быд фотографлӧн моделькӧд уджалӧмын аслас гусятор. Менам сійӧ сӧмын на артмӧ...

   А векжӧ эм кӧ олӧмад сэтшӧм морт, код водзын пыр верман лоны сэтшӧмӧн, кутшӧм тэ пыді пытшкӧсад, тайӧ зэв ыджыд шуд! Но... бокӧ кежсис менам.))

   Талун уджалім фотостудияын однофотокурсница Дашуккӧд. Коді вӧлі фотогафӧн, а коді модельӧн, тӧдмаланныд сёрӧнджык...

СУТУГА!

   Том коми войтырлӧн бара заводитчис тӧжд-нок кад... Колӧ и сыктывкарса коми КВН кежлӧ дасьтысьны, и "Лицей при"МИ" серти мӧвпавны, а медшӧрыс, медыджыдыс да медыззьӧданаыс, дерт, "FUROR - 2014" котыртны. Да, ёртъяс! Бара кутам фуроритны! таво сійӧ лоӧ... ну зэв аслыспӧлӧсӧн. Гусяторъяссӧ талун ог на висьтав. 

   Пекничаӧ юркарса коми культура шӧринын чукӧртчылім ошка-"мишкаяскӧд". Да, збыльысь ме найӧс талун ошка! Зэв уна тӧлка, креативнӧй да югыд мӧвп ёртъяс висьталісны! Зонъяс вӧліны и! Миян котырлы тайӧ зэв буртор, а то пырджык артмӧ кывбурын моз "шуӧны, нывбаба пельпом ас вылас кутӧ му шар..." 

  

  Зэв уна быдсикасторйыс миян чужис! Нӧшта ӧти мӧвп висьталігӧн, том йӧз казьтыштісны "сутуга" кыв. Ӧти бӧрся мӧд вӧзйӧм сетысь Натук другысь заводитіс небыда шуавны:

- СУтуга, сУтуга... Кутшӧм мича миян коми кывйыс...

   Тайӧ висьталӧм бӧрас "куснясьысь" кывйыс ставнымлы сэтшӧма мусмис... Быдӧн кутіс сійӧс небыда да мӧвпыштӧмӧн шуавны. 

   Талун ми Януккӧд дасьтім "FUROR"-лысь положение. И "сУтуга" кывсӧ бокӧ эг жӧ кольӧй! Дерт, финн-йӧгра ёртъяснымӧс ми ог гартлӧй ни ог пуксьӧдӧй сутуга сайӧ, но налы ковмас песыштны-небзьӧдыштны яйчиг-лысьӧмсӧ! 

   Коми кывйыд збыльысь зэв мича! Ми тӧдам тайӧс. И финно-йӧгра чой-вокным тайӧс тшӧтш тӧдӧны. А муӧдыс ӧд оз. Та понда, бара на ӧтчыдысь висьтала, миянлы колӧ лоны быд боксянь мича йӧзӧн, и чужӧмӧн, и паськӧмӧн, и лолӧн, и мӧвпъясӧн, кыдзи тай шуліс Антон Павлович Чехов... Мичаӧсь да бур йӧзӧн кӧ кутам лоны, ми мусмам мукӧдыслы, и мам кывным налы тшӧтш мусмас! Тайӧ тадзи! Унаысь нин казявлі...

МЕНАМ КОРОЛЕВА ЙЫЛЫСЬ

    "Коми йӧзкостса радиоын", кыдзи и мукӧд уджаланінъясын, овлывлӧны вензьӧмъяс. Ой! Эн думыштӧй нинӧм лёксӧ! Вензям ми сы серти, кыдзи бурджык мыйкӧ комиӧн шуны, вуджӧдны, пуктыны ударение... Тайӧ овлӧ быд лун. И талун тшӧтш. 

    Миян Таньколӧн талун петіс Сыктывкарса коми культура шӧринын нуӧдӧм "Пӧкрӧвся рытпук" йылысь уджтас. Радионыв сёрнитӧма сэтчӧс худрук, менам муса ёрт Юлюшкӧд. Таня шӧпкӧдӧ вомгорулас текстсӧ, юалӧ менсьым:

- Женя, а Юляыс КоролЕва либо КоролЁва?

- КоролЁва. 

- А мыйла сідзкӧ сійӧ меным шуис, мый КоролЕва. Кыдзи лыддьыны?

- КоролЕва сійӧ по паспорту, а шуны колӧ КоролЁва, - гӧгӧрвоӧді ме.

- Но мыйла сійӧ шуис асьсӧ КоролЕваӧн... - оз ӧвсьы Танько.

Ме сылы:

- Шуан ко радио пыр КоролЕва, тэ вылын кутасны серавны!

- Мыйла ме вылын? Сылӧн ӧд фамильеыс! 

   Ме мудзи вензьыны да звӧниті шӧринӧ, мися, пиняла Юлюкӧс, мыйла бур йӧзсӧ тӧлк вывсьыс дзугӧ. Телепон трубкасӧ босьтіс Василинушка, Юля пӧ абу. Ме сылы:

- Сценасянь кыдзи сы йылысь шуанныд?

- КоролЁва!

- А мыйла Таняыслы сӧрӧма?

- Но, гашкӧ, лов пытшкас сійӧ кӧсйӧ, мед вӧлі КоролЕва... - тэрыба разис гӧгӧрвотӧм дзугсӧ  ыджыд мывкыда Василина. =))

    Да. Гашкӧ, и тадзи. Но и тайӧ овтӧгыс, королевствуйтӧдзыс на, сійӧс нимтылісны нин королеванас. Юлюк сетӧ челядьлы коми кывйысь тӧдӧмлунъяс. Ӧтчыд пӧ пета ывлаӧ, а ныв-зон кильчӧ вылын лым зыртӧны. Кодкӧ казялӧма велӧдысьӧс да горӧдӧма:

- Кежӧй, кежӧй! Сетӧй туй Королева коми языкаыслы!))

ДА, МЕ ЖЕНЯ...

    Шапка вылас тьӧтӧн шуысьӧйлӧн "Ме сёрнита комиӧн". Акцияӧ весиг миянкӧд коркӧ пырӧдчыліс. Оз на Витюш сёрнит комиӧн, но эска, мый коркӧ кутас, ӧд и мамыс, и дядьыс роч посёлокын олісны, но сёрнитӧны комиӧн, мед и оз быд лун, но тӧдӧны да пыдди пуктӧны мам кывныссӧ. Тайӧ кагукыс и рочнас на неважӧн заводитіс варовитны, но кужӧ нин ясыда петкӧдлыны ассьыс джуджыд мӧвпъяссӧ.

   Петам Витюшкӧд талун гуляйтны, кепысясям. Сійӧ видзӧдӧ рӧмпӧштан водзын баситчысь мамыс вылӧ да шуӧ меным:

- Видзӧдлы, кутшӧм менам мамӧй НЫВКА.

- Да, - шуа сылы, - а тэ?

- А ме ЗОНКА!

- А коді ме? - юала кагуклысь.

Витюш пырысь-пыр:

- А тэ? Тэ ЖЕНЯ! =))

СЮРИС!

    Со, мый блогыд вӧчӧ. Шойччан лунъясӧ гижи шонді рӧма кампет йывсьыд, а талун нин сюрис! Тӧдмалӧй, кытысь? Дерт жӧ, "Магнитысь". Сійӧ ӧд быд керка бокын эм и быд карын. Ставсӧ нин ас бердас магнититіс. А висьталісны, мый сэні эм тайӧ кампетыс, менам радиоаньясӧй. Ньӧби. Вӧлӧмкӧ, ӧні сійӧ шусьӧ "Лимонный фреш", вузавсьӧ ичӧтик пачкаын - важмоз кӧрт зырйӧн сійӧс оз нин сӧвтны цалафанад.

  Кампетыс ичӧтджык сы дорысь, мый водзынсӧ вӧлі, небыдджык - бабъяслы оз нин ков кесасьны. Кӧрыс важ кодь жӧ, чайта, но абу дзик. Гашкӧ, мӧд ногӧн вӧчӧны, а гашкӧ, шань сьӧлома Еля баблӧн кисьыс сійо чӧскыдджыкӧн чайтсис... Сёйи тай ӧтиӧс а. Бур, мый талун артмис аддзыны гӧгыль-кампетсӧ. Векжӧ ӧд казьтышті челядьдырӧс, а аски, весиг талун нин, ме дорӧ гӧститны локтас кампет сёйысьӧй, тусь пиукӧй, тьӧтӧн шуысь Витюшаӧй. Чӧсмӧдла сійӧс аслам ичӧтдырысь шонді-кампетӧн, гашкӧ, быдмас да тшӧтш кутас казьтывны, кыдзи коркӧ воліс карӧ да сёйис Женя тьӧтыс дорын татшӧм дивӧсӧ и тшӧтш кутас корсьысьны верстьӧлунсьыс колян кадӧ туйсӧ... 

  
Р.S: "ВКонтактеын" "Коми блогйысь" котыр дасьтӧмнас да блогйысьӧмнас нинӧм весиг пуны эг удит... Мыйӧн и кута Витюшӧс вердны виж юмовторйыс кындзи... ))

ЧЕЛЯДЬДЫРЫСЬ КАМПЕТ

    Талун магазинын кутшӧм сӧмын кампетыс абу... И сьӧд, и еджыд, и гӧгроӧс, и пельӧсъяса, и ваплиа, и печеня... Нӧшта уна мукӧд сикас. Лавкаын пыр ёна бӧрйыся. Мыйсюрӧ ог ньӧб. Чӧскыдджык ӧд колӧ, да мед вӧлі шоколад, а эз карамель. Сэтшӧмтӧ ме ог сёй. Татшӧмсямаяссьыс сӧмын леденечьяс вомӧ босьтла, и то зэв гежода, дыр кад мунысь машинаясын да мый да, мед эз гудрӧдлы. 

   Кор кодкӧ казьтылӧ кампеткӧд йитчӧм ас олӧмысь вӧвлӧмтор, ме казьтыла шар кодь гӧгрӧс, вылітіыс сакара виж кампет да суседка Еля бабӧс. Татшӧм кампетсӧ ме ӧні некытысь ог аддзывлы, а эськӧ босьтышті, да-да! Кӧть и шуи, мый татшӧмъяссӧ ог радейт, но вижсӧ сакар пытшкын ньӧби эськӧ. Шонді кодь тайӧ гӧгыльыс вермас быгыльтлыны менӧ челядьдырӧ. 

    Удора районса Сёльыбын, миянкӧд орччӧн, сулаліс коркӧ киссьӧм сарая важ-важ керка. Менам талунъя гижӧдын "киссьӧм" - тайӧ абу важмӧм, а збыльысь киссьӧм! Зонпоснилы пыр окота вӧлі кутшӧмкӧ розьӧд гуйкнитлыны тайӧ сараяс да видзӧдлыны, мый сэні эм, мый видзӧны... 

     Керка пытшкас оліс пӧрысь баб. Ыджыд сьӧлӧма Еля баблы Енмыс шуӧма овны уна во. Ог кӧ сорсьы, мусӧ эновтіс сійӧ 94-нас. Унатор ме сы йылысь ог помнит. Верма казьтывны сӧмын, мый оліс сийӧ сэк на пиянсьыс торйӧн, ӧтнас. Ми мамӧйкӧд петавлывлім сылы мыйӧнкӧ отсыштны, пывсьӧдлім ас дораным. 

     А нӧшта... Сылӧн гортас пыр вӧлі сакарын быгльӧдлӧм виж рӧма гӧгрӧс кампет! Куш киӧн сы дорысь некор вӧлі он пет: гӧгрӧс радрлунтор пыр вӧлі козьналас судедка Еля бабным. Казьтыла, гуляйтам нывъяскӧд грездті, ворсам, а ме налы: "Мунам Еля баб дорӧ пыралам! Сылӧн шондівиж кампет эм..." ))  Татшӧмногӧн ме гажӧді олӧма аньӧс. Мый кӧть сэсся татчӧ шу... Ог тӧд, сэтшӧм чӧскыдӧн кампетыс тайӧ вӧлі, важ камодысь перйӧмыс кажитчис, ли Еля баблӧн шаньлуныс менӧ сы дорӧ пыр кыскис... Чайта, ставыс ӧттшӧтш. 

     Шензя... Гижӧдӧс заводитігӧн, вунӧма нин вӧлі тайӧ чӧскыдторйыслӧн кӧрыс, а помланьыс нин быттьӧ кыв йылын сійӧ лои. Помнита, мый бабъяс кесӧн татшӧм кампетсӧ юклісны. Пытшкӧсыс еджыд да шома кодь, виж рӧмыс да юмовлуныс ньӧжйоникӧн шонді югӧръяс моз паськалӧ ортсыас. Аддзыланныд кӧ татшӧмсӧ, висьталӧй меным, кӧні олӧ менам челядьдырӧй...

КЫДЗИ ПЫДДИ ПУКТЫНЫ ТАЙӦ ЗДУКСӦ?

     Бара нин вой. Мый и вӧча? Кытчӧ кадыс тюрӧ? Но и мед тюрӧ-визувтӧ!!! Збыль вылас, ачым ӧд сійӧс тэрмӧдла.... И ог сӧмын ме, но и ми ставным, и весиг тэ, менам лыддьысьысь. Асьным быттьӧ тайӧс ог казялӧй, но юрын пыр: "кор нин воасны шойччан лунъяс", "кор нин пажнайтны кутам", "кор нин паныдала ассьым полӧс", "кор нин колысясям", "кор Выль воыс ли гожӧмыс воас", "кор ме мӧдӧдча путешествуйтны"... И пыр тадзи. Ми олам ӧти лоӧмторсянь мӧдӧдз... Пыр мыйкӧ виччысям. А колӧ ӧд пыдди пуктыны тайӧ здуксӧ, ӧд сійӧ миян олӧмнымлӧн юкӧн. Кыдзи? Кыдзи овны виччысьтӧг, кадсӧ тэрмӧдлытӧг? Ми эгоистъяс - тэрмодлам оломнымӧс, а сэсся элясям, мый кадыс мунӧ ӧдйо, ми пӧрысьмам, а талунъя ныв-зон ёна кывзысьтӧмӧсьджык миян челядьдыр серти. Пыр тадзи вӧлі и лоӧ... 

     Со и талун удж вылын шуисны висьтавны, кыдзи локтан воӧ босьтам отпуск. Даааа... Тавося вӧльгымыс эз на коль, а ми локтан вося ноябрсӧ нин планируйтім! Пырджык ковмис подуласьны асланым котыръясын чужан лунъяс, рӧдвужлӧн кытчӧкӧ локтӧм-мунӧм да быдсяма лоӧмтор вылас. Бара на кадсӧ ковмис тэрмӧдлыштны, предсказатель моз видзӧдлыны во выло водзӧ... Но и но тай. 

    Нӧшта кӧсъя шуны, мый ме збыльысь кыла, мый ёна видза здуксӧ, мед сійӧ эз вош,  ... фотографируйтігӧн, кор меным колӧ кыйны аддзӧмторыслысь аслыспӧлӧслунсӧ, гӧгӧрвоӧдны тайо фотоаппаратлы да кужны сетны фотосӧ видзӧдысьлы сідзи, мед сійӧс вӧрзьӧдіс менам уджӧй.  Та порйӧ меным и юрӧ оз удит волыны локтан тӧлысь либӧ во йылысь мӧвпыс. И тайӧ менам неыджыд рецепт, кыдзи гӧгӧрвоны здукыслысь тӧдчанлунсӧ да пыдди пуктыны сійӧс!

ЛОКТІ, МАДАЯС! ))

       Чолӧм, дона ёртъяс да лыддьысьысьяс! Важӧн тіянкӧд эг "паныдасьлы". Локті шоныд муяслысь. Аддзылі уна кар, тӧдмаси уна йозкӧд, чӧсмаси уна сикас "выль" сёянӧн, уялі саридзын да пӧсь ваа ӧшмӧсъясын, кайлі кымӧръясысь вылоджык - Эльбрус дорӧ, рӧмпӧштанӧ моз видзӧдчи Кельыдлӧз тыӧ, нимкодяси Чегемса водопадъясӧн,  видлі ас киӧн нетшкӧм барбарис, кизил, груша, грецкӧй ӧрек, алыча, фотоаппаратӧн кыйи дельфинӧс да гӧраясын олысь кӧзаясӧс... Дыр на позьӧ висьтасьны. Быд лун волі быдса приключениеӧн. Тайӧ куим вежоннас олан нопъям чукӧртӧм опытыс, чайта, сӧвмодіс менсьым вежӧрӧс и сьӧлӧмӧс. Сідзкӧ, Женялӧн кутасны чужны бур гижӧдторъяс.  Унатор кӧсъя висьтавны, но узьны кыскӧ нӧшта на ёна... Аддзысям! Ыста кӧть некымын фото, мед ёна эн гажтӧмалӧй. ;)

Тайӧ Сьӧд саридз. Краснодар крайса Лазоревскӧйын.

Тайӧ Кабардино-Балкарскӧй Республикаын. Чегемскӧй водопад Адай-су.

Тайӧ мича Эльбрус дорын. 3500 метр вылнаын.

ЫСТӦЙ МАМНЫДЛЫ ФОТО

Ті ыстыланныд мамъясныдлы ассьыныд фотояс? Онӧй кӧ, ёна вӧзъя! Неважӧн на и ме тшӧтш гортӧ мӧдӧдлі гожся серпасъяс.

Менам ныр улын пыр эм комьютер, чорыд дискыс потсьӧ нин быд сикас лӧпсьыс. Тані эм быдторйыс. Но век медся окота пыравны  «ФОТО» папкаӧ. Сійӧ ловзьӧдӧ колян кадсӧ, казьтылӧ олӧмысь шуда здукъяссӧ да вунлӧм нин чужӧмъяс. Ӧти киноын кодкӧ геройясысь шуис, мый колӧ фотографируйтны став шуда здуксӧ, мед сэсся эн жалитӧй сійӧ кадръяссьыс, кодъяс эз веськавны фотоаппарат объективӧ…  

Водзынсӧ цифровӧй «мыльницаӧс» пыр сьӧрысь новлӧдлі. Ӧні мамӧлы сійӧс сеті. Аслам ыджыд зеркалка, кодӧс аскӧдыд быд лун он босьт. А телефонӧй, кыдзи шуӧ Никита воча вокӧй, «деревяннӧй». Та понда быд здуксӧ ӧні фотографируйтны ог вермы, кӧть эськӧ неважӧн и усьліс шуд велӧдчыны «GEOMETRIA ФОТО АКАДЕМИЯЫН». 

Ми, том йӧз, ӧні гежӧда печатайтам фотояс, миян ӧд ставыс син улын — техникаын. Ыстӧй кӧть пара, кӧть ӧти фото мам-батьныдлы. Налы ӧд пыр нимкодь листавны муса ныв-пиукныслӧн фотояса альбом, видзӧдны налӧн чужӧм вылас, вензьыны, код вылӧ кагаыс ёнджыка ветлӧ, ропкыштны ӧнія кадся модаа дженьыд платтьӧяс ли розя джинсыяс вылӧ, петкӧдлыны тайӧ серпасъяссӧ ёртъясныслы, рӧжвужлы либӧ уджъёртъяслы. Кӧть коми йӧзыд и оз ошкыны быдтасныссӧ ни оз ошйысьны асланыс челядьӧн, кӧнкӧ пыдын лов пытшкас налы пыр окота кодкӧдкӧ юксьыштны тіян вермӧмъяс йылысь радлунӧн.

Менам мамӧлӧн Женюклӧн фотояса эм уууна альбом, ичӧтдырсяньӧй ӧнія кадӧдз. Кӧсъянныд ко мекӧд бурджыка тӧдмасьны, корлӧй найӧс мамукӧйлысь.

Неважӧн гортӧ ветлігӧн, казялі, мый менам выль альбом гортын овмодчӧма. Мамӧ шуис, тайӧ пӧ тэнад. Видзӧдлі, а кышӧд вылас… ёж. Ме, шензьӧмон:

-  А мыйла менам альбом вылам ёжик?

- Сы вӧсна мый ёжик кодьӧн мукӧддырйиыс овлан, - нюмдыштӧмӧн шаня вочавидзис мамукӧй. :))

МУСА МОРТЛӦН СИН

Отпуск водзын тыри уджӧн, но кольны лыддьысьысьясӧс гижӧдтӧг ог вермы. Сідз нин регыд меысь шойччыны кутанныд.)) Со мый аддзи архивысь. Гижӧдыс нёль во сайся. Ог тӧд, мый подув вылын артмылӧма сійӧ, но талун мӧвпъясӧй збыль татшӧмӧсь жӧ...

         Вöян тайö тыас, но он кöсйы мездысьны. Тöвру шумöн кыпöдö гыяс, но он тэрмась, он весиг мöвпав кевмысьны. Тані тэныд лöсьыд, шоныд, небыд, и тэ он окотит татысь петны, кöть и вартчынытö татшöмлаын некор эн кужлы. Кыдзи веськалiн тайö джуджыд инас, ачыд он гöгöрво, он помнит… 

Муса мортлöн синмас пöртмасьö став мичаыс, сöстöмыс, меліыс, мый эм тайö паськыд му вылас… Тэ пöдан тайö мичас, но öд медшöрыс, медмусаыс, меддонаыс тайö мичас буретш тэ… Тэ понда и мукöдторйыс тайö мортыслы мусмö. Сöмын кор тэ видзöдчан сылöн синмас, синаканьыс ыдждылö саридзöдз. Но ваыс сэні, мыйлакö, ньöти абу сола, а кампет кодь юмов. Тані тэ рöмпöштанын моз тыдалан, но збыльвывсасьыс ёна мичаджык да бурджык.

Сöмын видзöдлан муса мортлöн синмас, и гöгöрвоан нин сылысь шогсö, долыдлунсö. Тані оз ковны кывъяс - видзöдлас вермас висьтавны унджык. Лöглун ли майшасьöм сэтысь аддзигöн, йирмöг босьтлас, кынтылас… Радлунöн кö видзöдласыс тыр, дзордзалысь льöм кöра мелі тöвруöн быттьö öвтыштлас…

Тэ сёысь, весиг сюрсысь сійöс тöдмалан, тайö синсö… Сьöлöмыд висьталас… Вежöрыд казьтыштас… 

ФИНН-ЙӦГРА ФИЛОЛОГЪЯС ЙЫЛЫСЬ ГУСЯТОР

Да. Тайӧ гусятор… Гусятор коркӧ вӧлі, но ӧні нин, кад кольӧм мысьт, позьӧ кодлыкӧ и висьтавны. Гижӧдсӧ сиа дона ёртъяслы: Андрей Фёдоровичлы  да Ёмка Колялы. Чайта, оз кутны ме вылӧ ёна скӧравны висьталӧмӧй понда, а мекӧд тшӧтш нюмдыштасны кӧнкӧ ылі Инта районса Петруньын да Эст муын ли Удмуртияын…

Ветлӧдлі талун арся Сыктывкарті… Казьтылі студенталан кадся медшуда арнымӧс. Тайӧ вӧлі витӧд курс. Кӧч тӧлысь, а велӧдчыны оз ков. Асывсяньыс волі тӧвзя практикуйтчыны «Коми йӧзкостса радиоӧ»…

А рытнас пыр радейтана ёртъяскӧд! Кор пусям-пӧжасям, кор сьылам, кор прӧста юксям лунтырся лоӧмторъясӧн, а кор и гуляйтам.

Ӧти рытӧ «Ордым» лавкаӧ пыралӧм бӧрын локта вӧлі студентъяслӧн ӧтуволанінӧ, сэкся гортам. Киам зэв сьӧкыд мешӧк. Сэні «Коми орфография кывкуд» да гӧрдов кирпич – "Русско-коми словарь". Небӧгъяссӧ корис ньӧбны да ыстыны менам сиктысь том велӧдысь Людмила Васильевна Селиванова. Сійӧ сетӧ ныв-зонлы коми кывйысь тӧдӧмлунъяс Удора районын Черныбса школаын. 

И сідз. Муна гортлань. Триньӧбтӧны зонъяс. Ми пӧ Колялӧн ӧтуволанінас (ми сэк торъя керкаясын олім), тэ пӧ кӧні, общагаӧ кӧсъям ветлыны. Мися, но петӧй, ме тіянсянь матын нин.

Паныдасим, сувтодісны менӧ шӧрӧ, мырддисны небӧга мешӧкӧс, пырыс тыдалана зонтикӧс, кодӧс ме пыр нимта «детскӧйӧн», босьтісны менӧ кыкнан боксянь ки полӧд. Мунам и пыр мыйкӧ бызгам-больгам-варовитам… Другысь зонъяс кутісны дурны. Ӧтиыс ёртсӧ йӧткалӧ зонтӧн, а мӧдыс тойлысьӧ пакетӧн. Эн кӧть думыштӧй, мый найӧ тышкасисны. Эз, дерт. Татшӧм ышмалӧмыс налӧн вӧлі. И друг… Эндрю, кыдз ми сійӧс шуим томдырйи, кутіс лэбзьӧдны пакетсӧ Колилань, а мешӧкыд кыыыдз тааай потас… А шнич выль кывкудъясыд мичаа шняпкысисны веськыда ва гӧптӧ… Пырысь-пыр заводитім мездан операция. Перйим небӧгъяссӧ. Одйӧ котӧртім гортӧ. Листбокъяссӧ кутім чышкавны, пӧлявны, косьтыны… Но «тӧварнӧй видӧдз» вайӧдны небӧгяссӧ эг и вермӧй. Орфография кывкудйыс татшӧмыс аслам выль вӧлі. Шуи сетны сійӧс сиктса велӧдысьлы, а ачым босьті неуна няйтсьӧмсӧ. Мӧд кывкудйыслӧн кӧзяиннас лоис талун велӧдысь нин жӧ Андрей. Эз и мӧвпав, мый сылы тайӧ небогыс колӧ, а кывкудйыд ачыс сійӧс аддзис. Удораӧ ыстӧм вылӧ ньӧбим бара на выль «кирпич».

Чайта, тшӧкыда Эндрю казьтылӧ тайӧ серамбана-шогалан лоӧмторсӧ (500 шайтыд студентыдлы ого-го кутшӧм на сьӧм) кузь тӧвся рытъясӧ урокъяс кежлӧ дасьтысигӧн… Менам со пызан вылын куйлӧ жӧ орфография кывкудйӧй. Тӧрыт на джадж вылысь перйи – блогӧс ӧд тӧлкӧн колӧ зільны гижны да…