понедельник, 12 сентября 2016 г.

ВИЖЪЮРЪЯСЫСЬ ВИНА ПУӦМ




Вижъюръясысь вина. Асьныс тайӧ кывъясыс – быттьӧ кыв вылад гожӧм. Вижъюръясысь вина – кутӧдӧм да сулеяясӧ йӧртӧм гожӧм. © Рэй Брэдбери «Вино из одуванчиков»


Небӧгса герой Дугласлӧн кодь "гожӧмыс" менам абу, но вежӧрын олӧ быд сикас казьтылӧмыс. Зіля сэні видзны медся буръяссӧ, меліяссӧ, шаньяссӧ, серамбанаяссӧ...
  Вишняя-помидора шондіа инын колян вося шойччӧм бӧрын со кутшӧм казьтылӧм "йӧрмӧма" менам юрын... Юкся!
   Гудралі яблӧгысь пирӧг, сюйи сійӧс пач-духовкаӧ да босьтчи лыддьысьны, юктӧдны-озырмӧдны лов пытшкӧс Рэй Брэдберилӧн «Вино из одуванчиков» небӧгӧн.


   Сы выйӧдз кыскисны асланыс мирӧ книгаса геройяс, мый эг и казяв, кыдзи чӧскыд дук вылӧ пусян-пӧжасян жырйӧ пырис кӧзяйка. Син читкыртӧмӧн видзӧдліс небӧг вылас, видліс лыддьыны гижысьлысь сьӧкыд нимсӧ (авторыс, кыдзи и серпас вылас, вӧлі пасйӧма небӧг нимсьыс ёна ыджыдджык шыпасъясӧн) да шуӧ: 
- А, ас кыв вылад лыддьысян?
Мися:
- Ог! Рэй Брэдбери – тайӧ авторыс.
- А мый, сідзкӧ? Ви-но из одуванчиков… - матӧджыка локтӧмӧн лыддис ань, а сэсся шпыньмунӧмӧн гораа содтіс: - На фиг тайӧ тэныд колӧ?!
   =) Кӧзяйка чайтіс, мый ме тӧдмася рецептъяса небӧгӧн, медым сэсся пуны вижъюръясысь вина (кӧть эськӧ ме и дась винасьыд сосся)! Вот и сералі… =) 
    Збыль вылас Рэй Брэдберилӧн тайӧ гижӧдыс - "пусян ногъясӧ" велӧдан небӧг и эм, но дзик мӧдтор серти… Кыдзи овны, нимкодясьны кытшалысь мирнас, радейтны йӧзӧс да олӧмсӧ…  


Комментариев нет:

Отправить комментарий