пятница, 16 сентября 2016 г.

ДЗОЛЮК ДА ПОЛИЦИЯ

Ыркыд нима жар кар… Тайӧ тані медся тыдалана либӧ, стӧчджыка кӧ, медкылана лӧсявтӧмторйыс. ©

   Бӧрйыси кӧ ме платтьӧ сыктывкарса вузасянінысь, да сэтчӧс уджалысь шыӧдчис ме дорӧ «тэ», ме эськӧ эг кут ёна видзӧдавны сэтчӧс паськӧмсӧ. Мыйла друг ме лои сылы «тэ»?! Гимназияын на гырысь классъясын миянлы мукӧд велӧдысьясыс шуӧны вӧлі «Ті», «уважаемые выпускники» (бӧръя велӧдчан во заводитчигӧн на). Но тадзи Сыктывкарын… 
    Кавказын быттьӧкӧ ставныс ӧта-мӧдыслы ёрт-друганъяс.=) А тайӧ «лӧсявтӧмтор» дорас коркӧ велалӧны и небыд коръя войвыв дзоридзьяс... Тӧдмаси ӧти школаса директоркӧд. Да ӧд весиг сылӧн вомсьыс ӧтчыдысь петаліс меным  «тэ», но веськӧдлысь пырысь-пыр правитіс асьсӧ.  
    А нӧшта тайӧ директор коддьӧм йӧзыс, да и сійӧ тшӧтш, медводз юалӧны менсьым: «Кымын тэныд / Тіян арӧс?», а юргӧ тайӧ тадзи: «Кымын кӧть тэныд арӧс, кага?» Кор вочавидза, мый меным 26, шуӧны, мый чайтісны менӧ томджыкӧн (вот аддзылісны кӧ найӧ менам велӧдчан группаысь нывъясӧс, вопше эськӧ детсад туйӧ пуктісны =)). Тайӧ, дерт, бур, мый менӧ томджыкӧн чайӧны, но мыйла… Ме ӧд некыті абу ичӧт… Гашкӧ, сы вӧсна мый Войвылын кучикыд озджык пӧрысьмы, а лунвывсаяслӧн арлыд серти дзик мӧд представленньӧ… 
    «Юрган» радиоын уджалігӧн тай Машук миян пыр вӧлі тест нуӧдӧ. Петкӧдлас кодлыськӧ фото да юалас: «Кыдз чайтан, кымын сылы арӧс?» Коркӧ тӧдмавлім, а коркӧ и эг. Татчӧс войтыр кӧ видлалісны миянлысь фотояс, татшӧмсяма зачётсӧ эськӧ эз сдайтны.  
    А гожӧм заводитчигӧн Сыктывкарын мекӧд лоис татшӧмтор. Локтам вӧлі «Орбита» бассейнысь рытъя сеанс бӧрын. Подӧн восьлалігкості Марьякӧд (мӧд нин, менам уджъёртӧй жӧ) ёна больгим да ылалім кадсьыс. Коли Машукӧс керка дорсяньыс неылын, ачым веськӧдчи гортлань. И друг… Мекӧд орччӧн сувтіс полиция! Петіс формаа том морт да шуис: 
          - Видза оланныд! Пекӧдлӧй паспортныдтӧ!  
   Мися: 
- Менам аскӧд абу! 
- А кымын Тіян арӧс? 
- 26!
- Кора прӧшша, - да бӧр гуйкнитіс машинаас.


Но сыктывкарсаясӧс ме гӧгӧрвоа. Вӧлі зэра пемыд рыт. Мышкам ӧшаліс велӧдчысьлӧн кодь ноп, ме вӧлі толстовкаа. Да и мышсянь менӧ аддзисны… А вот мӧд мӧд карын… Сёрӧн, паспорттӧг да ӧтнам ывлаӧ ог пет!

2 комментария:

  1. Коми йӧзыдлӧн "Ті" нормаыс воис мӧд войтырсянь велӧдан юкӧн пыр уна нэм сайын. Вӧдитчӧны сійӧн общественнӧй олӧмын, велӧдчанінъясын. Велӧдісны миянӧс карса олӧмад. А ас костын, торйӧн нин сиктын, век на шыӧдчам "тэ" арлыд вылӧ видзӧдтӧг - мортыс ас коддьӧмӧн чайтӧ. Со пиӧй ыджыд батьыслы да мамыслы век шуӧ: "Тэ кытчӧ мунан?" И некутшӧм паныд сувтӧм оз чуж.

    ОтветитьУдалить
  2. Алексей Николаевич, аттьӧ лыддьӧмысь да колана гӧгӧрвоӧдӧмысь! Вот кутшӧм пӧлезнӧ овлывлӧ ветлыны выль инъясӧ, тӧдмасьны сэтчӧс культураӧн... Мыйкӧ и ас йывсьыд воссьӧ!

    ОтветитьУдалить